उफड़ारना चोट्टो टकुवा नू कुड़र'ई

     ओन्टा चिपो पतड़ा नू चिगलो र:आ लगिया। हेद्देनुम कुँड़ुख़र गहि ओन्टा सन्नी पद्दा रहचा। चिगलो ख़ेरन अरा एड़ा ख़द्दन गुट्टिन धर:आ गे घड़िम - घड़िम पद्दा तरा बर:आ लगिया अवंगे पद्दा ख़ेप्पोन ता आलर,ख़द्द -ख़रर आ चिगलोन ए:रार चिन्हचकर रहचर। आद पद्दा नू इकला मला,डंड़टिकूर तरा हूँ तंग्है चरा बेद्दा खतिर कूद्दा - नुंगा लग्गिया। पद्दा कूटि नू ओन्टा ढोढ़रो रहचा अदि गहि धसड़ां नू ओन्टा सेम्बाली मन्न में:च्छा कुना रहचा। आ मन्न नू बकुला अरा ननना ननना ओड्डार खोत्ता नू आर गहि ख़द्दर परदा हेल्लरा लगियर आबीरी आर गे चारा गहि जोगाड़ नू बकुला अरा रकम - रकम किसिम गहि ओड्डा गुठि ढोढ़हन ता अम्म हेद्दे ईज्जो ककड़ो, पोचगो अरा मूंख़ा गुठिन धरआ मो:खा गे एत्ता लगियर। 

     उन्दुल चिगलो ओना - मो:ख़र दरा कूलन उड़ता गे अत्तरा - इत्तरा कुद्दा नुग्गा लगिया। ढोढ़ाहा कूटि नू ओन्टा बकुला एथरा। बकुला अम्म हेद्दे इजअर ईज्जोन अरा मुख़न ए:रा - जोंहआ लगियर। चिगलो बकुलन मो:ख़ा खतिर अदि संग्गे चलाकी ती यार जोड़रना गहि जोगाड़ नना हेल्लरा। बकुलन आनिया दगे नाम यार (सहिया) जोड़ओत अरा नाम दुयोत संग्गे नलख ननोत होले ओन्ना - मो:ख़ना नू नमागे दिक्कदारी मल मनो। एकअम उल्ला नीम आलोन बेद्दोय होले दुय्योत ख़टरो:ओत मो:ख़ोत। इकला ए:न आलोन धर:ओन आ'उला इरबारिम गहि कूल उड़ओ । नलख सेब्बानुम चलरो कालो। बकुला चिगलो गहि कत्थन उइय्या। दुय्योर नू सहिया मंज्जा। औलामतिम आर लोला चोन्हा अरा हेलमेल नू र:आ लगियर। चिगलो बकुलन मोख़ा गे बेड़ा - मोकन एरनुम र:आ लगिया। आर उन्दुल ओन्टा कूड्डीन अरा तुम्बन अम्बिका इरय्यर। 

     चिगलो बअचा गुचा संग्गी नाम टोंका तरा चोट्टो अरख़ा गे कालोत? हेद्देनुम आर दरगां नू पूना चोट्टो चुरिन इरयर। आर दुय्योर मूरखेम आड़िन अरख़ा हेल्लरर। चिगलो कुड्डी तुरू आड़िनता लात्तान अरख़ा लगिया आबीरी बकुला रफ-रफ ठोर तुरू धरअर तुम्बा नू सजआ लगिया। चाँड़ेम तुम्बा निन्दया केरा। चोट्टोन मो:ख़ागे चिगलो गहि ब'ई ती लाले चूरख़ा हेल्लरा। अत्तरा बकुला हूँ तुम्बन गेच्छाम गुच्छबअर होरमी चोट्टोन मोख़ागे ताक एरा लगिया। पहें इरबरगे ताक मल ख़खरा लगिया ख़ने चिगलो बकुलन आनिया गुचा संग्गी नाम चि:च्चनू कुड़ोत होले अजगुत एम्बा लाग्गो। आद बकुलन बा:चा -ए:न काला ओंगदन पहें एंग्गा गे चि:च्च ओन्दरअर किरनू एका बग्गे बेड़ा लाग्गो से ले नीन उढ़ियार नुम कला दरा चि:च्चन ओन्दरअर बरा ए:न चोट्टोन ख़ापोन। बकुला चिगलो गहि चालाकिन बुझरा पोल्ला। आद चि:च्च ओन्दरा:अ चाईल केरा। चि:च्च ओन्दरो बीरी ताका तुरू चि:च्च लघरा लगिया होले आद चि:च्चन ख़ेख़ेल नू लगिया अनेमनुम अदि गहि तनि मनि पेंच्छो उलिय्या केरा। 

     बकुला चि:च्च ओन्दरा केरा आबीरी चिगलो गे मोका ख़खरा। आद ख़ोलान अम्बर होरमी चोट्टोन मो:खा चि:च्चा। ख़ोलान चोट्टो गहि लात्ता नू चोट्टो गहि कोरचकन एदा गे सज्जा। बकुला बरचा दरा ईरी की तुम्बा नू ओन्टा हूँ चोट्टो मल्ला। ख़ने चिगलो तिंग्गिया। ए:न बराबरी ख़ट्टा गे तुम्बा कुलियन ख़ने होरमी चोट्टो उरखा दरा लात्ता नू कोरचा केरा तो एन एन्देर ननोन। निंग्गन ए:रा केरान नीन मल एथर की। बकुला लात्ता गुसन कालर ख़ोलान नतगी आबीरी ख़ोला इकला उरखी। आद अक्खा केरा की चिगलो होरमी चोट्टोन उड़ना गुटी मो:ख़ा। बकुला गे बराबरी बखरा मल अम्बिया। बगुला चिगलोन केबा हेल्लरा। ख़ने चिगलो अदि तरा नूर-नूर र:आ ए:रर बा:चा अक्कू गा नम्है सइहा - गुइहा एसरा केरा। बगुला आदि गहि ख़नन ठोठआ गे हेद्दे केरा। चिगलो मोका ए:रा लगिया। एकासे बकुला हेद्दे बरचा अनेम अदि गहि नरटिन धरचा दरा चरार-पलकार मो:ख़ा चि:च्चा। एन्ने चिगलो अगाम चालाक रहचा। सइहान हूँ मल अम्बिया। 

     आद एन्ने नंजका ख़ोख़ा फुलाई - बड़ाई नू र:आ हेलरा। अदि गहि जहड़ी बग्गा परदा हेल्लरा। आद तंग्है फुलाई - बड़ाई नू तेंग्गा हेल्लरा। ए:न मेख़ा मइय्यानता उढ़ियारना आलोन मो:ख़ा ओंगदन तो ख़ेख़ेल ता अड्डो मनख़ा लकड़ा - मेढ़ो,अल्ला गुठिन ती एन्दरा एलेचना र'ई । उन्दुल डहरे नू ओन्टा मेढ़हो ख़खरा अदिन बाचा - ए:न निंग्गन मो:ख़ोन। ख़ने आद आनाकिरताचा नीन एंग्गन मो:ख़ा ओंगओय? निंग्गन एन कुसोन दरा पिटोन चि:ओन। आद चालाकी तुरू धरअर चरर - पलकर मो:क्खा चि:च्चा। मुंधभारे ओन्टा ओय एथरा अदिन बाचा निंग्गन मोख़ोन। ख़ने आद आनाकिरताचा - ए:न निंगन लथओन दरा पिटोन चि:ओन। अन्नू हूँ आद मो:खा गे जहड़ी एदआ हेल्लरा। बा:चा - ए:न ओन तुम्बा चोट्टोन भोकन!चरक चंदन बकुलन मो:कन,कबस - कुबूस मेढ़हो मो:कन। निंगन मोख़ा पोल्लोन ब:अर अदिन हूँ चरर -पलकर मो:क्खा चि:च्चा। कानुम - कानुम अदि गे ओन्टा अंड़िया मनख़ा ख़खरा। अदि गुसन कालर ब:चा निंगन मो:ख़ोन ! ख़ने आद आनाकिरताचा एन निंग्गन कुस्सोन दरा पिटोन चि:ओन। अन्नू हूँ आद पैंतरा ननर पिटया दरा मो:क्खा चि:च्चा। बिड़ना उल्ला रहचा अदि गे अकय अम्म ओनका लगिया। आद पोखरीनू इत्तिया दरा ओन कूल ढिरढिर र:आ अम्मन ओंड्डा चि:च्चा। पोखारिन बता ख़चिया। एका बारी आद तंग्है मांदा किरा हेल्लरा आबीरिम एँड़ झन कुक्कोर ख़खरर। आर तंम्है अड्डो मनख़ा गे घाँसी ख़ोयर की आर हूँ एड़पा किररा लगियर। आर गहि संग्गे भार उगी एपटा अरा तंतार हूँ रहचा।

     आ चिगलो ईर गुसन केरा दरा आनिया एन निमन पिटोन दरा मो:ख़ोन। आर आना किरताअर आनियर अना सिरूपांड़े नीन ढिरढिर र:आ उडचकय रअदय अन्नू हूँ एमन मोख़ा बेदाय। मुंध नू नीन एम्है गड़चका एपटन तो डेगआ दरा पार मना अदि गहि ख़ोख़ा एमन मो:ख़ोय। एम हूँ अख़ओम की नीन एवंदा जोड़गर सवांगिया रअदय। आद आर गहि कत्थन मेंज्जा दरा तमतमरा केरा दरा बा:चा एन ओंद तुम्बा चोट्टोन मोक्खन,चरक चंदन बकुलन मोक्खन,गबस गुबूस मेढ़होन मोकन,ओंय-ओंय कड़रून मोकन,छल-छल निन्दका पोखारिन बत्ताचकन। निंमन मो:ख़ा पोल्लोन ब:अर गड़चका दुयो एपटन पार मना गे डेगचा आबीरिम सुंइतू दुयो एपटा नू अदि गहि ढिरढिर र:आ उड़चका कूल उम्परा केरा। एकासे उम्परा अनेम पोखारिनता ओंडका अम्म संग्गेम ओंडका - मो:क्खका पचका मल पचेचका अहड़ा अरा पीक हदहद र:आ उरखा केरा। तनि - मनि उफड़ारा अरा के:च्चा केरा। खेअर आद दुयो एपटा नू टंगरा केरा। दुयो कुक्कोर इलिचियर दरा पद्दा तरा भोंक्का रहचर । आर गहि घोखना रहचा की एपटन कट्टर आद एमन मो:ख़ो चि:ओ। ढ़ेर ख़ोख़ा नू पद्दा तरते किरनर दरा ए:रनर की आ चिगलो के:च्चकी र'ई , तब आर गहि एलचना भोंगा। 

     ई खीरिन ती इदिम अख़तारी'ई की आलर गे लालची, घमंडी अरा फुलाई -बड़ाई मल ननना र'ई । सवांग गहि हूँ बड़ाई -फुलाई मल ननर,नगद घोख उय्यर आलर संग्गे ओक्कना - इलना दिम दव डहरे अरा नलख हि:क्के। इत्तुम आर तारनर कानर।