13.भरियस अरा लकड़ा

     बिड़ना उल्ला रहचा। लकड़ा गे अम्म ओनका लगिया। आद कूबी गुसन अम्म ओना केरा दरा इन्दिरा (कूबी)नू खत्तरा केरा। ओन्टा भरियस कूबी ती अम्म निन्दआ लगियस। लकड़ा आस गुसन ओहरा - बिन्ती नंज्जा दरा बाचा भरिया नीन एंगन निंग्हय झूड़ी (भार) तुरु ओथरआ चिआ झुड़िन कूबी नू एत्ताचस। लकड़ा झुड़ी नू उक्किय्या ख़ने आस झूड़ीन नतगियस दरा ओथरस। लकड़ा कूल कीड़ा सारकी रहचा। मइय्या उरखा दरा आद आ भरियासिन मोख़ा बिद्दिया। ख़ने आस आनियस एन निंगन इन्दीरा ती ओथरकन। नेक-धर्म गहि इदिम खंज्जपा तली'ई?

      आर नेवई ननागे अड्डोन पंच उय्यर। अड्डो ब:आ हेल्लरा,ईसीन्न मो:खाय चि:अय। आलर एमन अगम ससाइत चिअनर। एमन लदनी कमनर। मला होले उगता पगसीन नतगताअनर। आर कोल्हू नू हूँ नाड़नर। अदि ख़ोख़ा आर टटख़ा मन्नन पंच उय्यर। टटख़ा मन्न ब:ई ईसीन मो:खाय। आलर एंग्ग मइय्या अकय धिंगी नननर। एकाबीरी एंग्है खंजपा मनी आबीरिम ती लेबदा - लाठी नननर। पनोन आबीरी हूँ चोख़नर मो:खनर। 

     ख़ोख़ा नू सिरू पांडे सिन पंच कमचर। आस आनियस एन्देर कत्था र'ई ? तेंग्गोर होले जुनू नेवई ननोन। आर तंम्है - तंम्है कत्थन ओन सिरेम ती तिगिय्यर। सिरूपांडेस तजबीज नंज्जस दरा अखस की ई लग्गा नखरना नू लकड़ा गहि सरासर गलती र'ई । लकड़ा गे भलाई गहि बदले आस गहि दी:ख-दन्द नू सहाड़ा चि:अना चाही। उल्टी आद आसीनुम मो:खा बिद्दी। ईदगा मलदव कत्था हिके। लकड़ा गे सजाई मन्ना दिम दव कत्था मनो। सिरू पांडेस मेंज्जस नीन एका से खतरकी दरा कूबीन ती ने निंगन ओथरस। लकड़ा तिंगिय्या भरियस एंगन झूड़ी नू ओक्कताअर नतीगियस दरा मइय्या ओथरस। तेंगाय तो नीन एका से झूड़ी नू उक्की? ख़ने आद अकबकारनुम झट कुना झूड़ी नू उक्किया। आबीरिम सिरू पांडेस भरियासिन कनखाचस दरा आनिया इन्दिन लवना दरा पिटा?आस गुसन भार गहि एपटा रहचा अतुम ढेड़ाबआ हेल्लरस। आस इदिन एपटा तुरू इवंदा लवचस की आ बायमान लकड़ा केच्चा केरा। सिरू पांडेस गहि नेवई जायज मंज्जा।