नागिन परी
ओन्टा ढेर कोहा राजी रहचा। अइय्यनता राजास अगम दव आलस रहचस। आस तंग्हय आलर गे होरमी बारी दव-दव कत्थन घोखआ लगियस। आस गहि दू झन कुक्कोर-राजकुमार रहचर। कोहस गहि नामे जीत सिंह अरा सन्नीस गहि नामे गन्दूर सिंह रहचा। सन्नी सिन चोन्हा तुरू लल्लू बबू आना लगियर। ओगहोन हेद्देनता राजास ईर गहि राजीन बचागे आक्रमन नज्जस चिच्चस।ईर हारचर केरर कोहा तंगदासिन धरअर हरि-बिरी (हथकड़ी) अत्ताअर जेहेल नू सज्जर चिच्चर। सन्नी राजकुमारसिन होअर भीतरे ता लात्ता ती राजास रानी संग्गेम उरखस दरा ओन्टा अंज-खंज टोंड़ग नू नूख़रस दरा परता गहि चपाइल (गुफा) नू बासा नंज्जस।
उन्दुल राजकुमारस माख़ा बीरी ओन्टा मुक्का गहि चींखनन मेंज्जस। आस तंग्गियो तंम्बस ती मेनर तीर कानन होअर एका तरते चींख़ना मेन्दरा लगिया अतरम केरस की एरदस ओन्टा नागिन चपाइल नू अरबरकी थी । अदि गहि आलर भेसे चीखनन मेंज्जस दरा अकबकरस केरस। आस मेंज्जस नीन आलर लेक्खे एकासे कच्छनखरा लगदी? ख़ने चींख़नुम तिग्गया। एन मेखानता परी हिकेन। तनि-मनी गलती मंज्जा अवंगे देवतर एंग्गन स्राप(श्राप)चिच्चर।एन इसते काला लकिन आबीरिम स्राप गहि करने ओंगोहोनुम पखना गहि चपाइल एंग्हय मइय्या खतरा केरा ख़नेम एन पखना नू अरबरकिन रएन। आल परी तलएन से ले आलर लेक्खआ कच्छनखरएन। राजकुमारस कटिक घोखचस अन्तले तंग्हय ख़ेखा तुरू पखनन उटकचस दरा अदिन दु:ख तुरू बछाबाचस। पखना गहि गुच्छबाचका ख़ोंख़ा आद चीख़नन अम्बिया। अदि गहि ब'ई आलर लेक्खा मंज्जा। देह नेररे लेक्खअम राइह केरा। नागिन आनिया निंग्हय ई उपकार गे एन निंग्हय भलाई ननोन।
राजकुमारस तंग्हय दु:ख तिंग्गयस। अदिन मेंज्जा दरा नागिन परी बाचा नीन एग्हय सरापन मेटाबआ चिआ होले एन निग्हय दु:खन भोगतोओन चिओन। ई परतान ती आ पक्खे ओन्टा जादूगरस रअदस। आस गुसन स्राप मोचन मणि र'ई । कला नीन आस गुस्तले अदिन ओंदरआ। राजकुमारस मणि ओंदरागे उरखस। डहरे नू ओंन्टा सेन्दरा बेचूस ख़खरस। आस ओन्टा पाझन बाज ओड़ान धरचकस रहचस। पाझ अम्बरआ गे उफड़ारआ लगिया।आस सेन्दरा बेचूसिन बाचस नीन ई बाजन अम्बा चिआ। एन निंग्गा गे एग्हय सोना गहि मुद्दिन (अंगुठीन)चिअदन। सेन्दरा बेचूस मोद्दिन होअर पाझ ओड्डान अम्बियस चिच्चस। पाझ उढ़ियारनुम अनिया एन होरमी पाझार गहि बेलन (राजा)हिक्कदन। दु:ख नू एंग्गन याद ननके। आस अदि गहि एन्ने बअनन मेंज्जस दरा आस हयकट मंज्जस।
अक्कु आस गे और ओन्टा सहाड़ा ननुस ख़खरस। कानुम-कानुम बीड़ी पुत्तिया केरा। डहरे नू आस गे ओन्टा ख़ाड़ ख़खरा। ख़ाड़ नू सेंदरा बेचूर ओंन्टा मगरमच्चन (घड़ियालन) धरचकर रअनर। आद अम्बरा गे उफड़ारआ लगिया। राजकुमारस गे अगम सोग्गे लगिया। आस तंग्हय तड़ारिन आर गे चिच्चस दरा अदिन अम्बताचस। अम्बरते आद बाचा एन मगरमच्छ गहि बेलन तलदन। दु:ख नू नीन एंग्गन याद ननके। राजकुमारस अनियस नीन एंग्गन ख़ोसरन (नदीन)ती अपक्खे होओय चिओय? आद अलखनुम-अलखनुम आसीन ख़ाड़ान पार नंज्जा चिच्चा। हेद्दे नुम जादू गरस गहि एड़पा रहचा। होरमी तरा पखना गहि मूतिन ईरय्यस। आर कतई अलखा लगियर। मूर्ति गहि अलखनन एररर आस इलिचियस केरस दरा ओन्टा मन्न गहि मूली नू नूख़रस। ख़ने ओन्टा मूर्ति बअचा नूख़रकन ती एन्दरा हूँ फायदा मल्ला। आस गहि ईरकनतिम नीन पखना मनोय कालोय।
आस गे नागिन परी गहि कत्थन याद मंज्जा। भोंगनुम-भोंगनुम आस ख़ाड़ कूटी बरचस।आस मगरमच्छन आनियस नीन ख़ोसरा नू कोअर निंग्हय होरमी मरगमच्छरन ओंदरय। बाजान हूँ बाचसनीन होरमी निंग्हय बाजय अरा ओड्डन ओन्दराअय दरा बराय। मगरमच्छ आस गहि एड़पा नू होरमर कोरचर केरर ख़ने एलचर आस गे एड़पान ती उरखना मंज्जा। एकासे उरखस अन्नेम पाझ अरा नाना ओड्डद नोचआ-नोचआ आसीन पिटया चिच्चा।आस गहि जादूगिरी मेरखा अरा ख़ोसरा नू मल चलरा। मगरमच्छ हूँ आसीन चबचा।
जादूगारस केच्चस केरस। महल गुस्ता मूर्ति आनिया। जादूगारस गहि कूल भीतरे मणि र'ई । जादूगारस गहि कूल ती मणिन ओथरस। मणि गहि सक्ति तुरु होरमी पखना गहि मूर्ति आल मंज्जा केरा। गोटा तरा चहल-पहल मज्जा। पखना बंचका आलर गहि राजास बाचास एंग्हय एन्दरिम दरकार र'ई का मल्ला ? राजकुमारस तंग्हय होरमी दु:ख तकलीफन तिंग्गियस चिच्चस।आ पखना बंचका राजास तंग्हय सेनान तुरंत ओन्दरस दरा राजकुमारस संग्गे-संग्गे काला हेल्लरस। डहरे नू आस गहि मुलाकत नाग परी संग्गे मंज्जा। आस मणि गहि मदद तुरू नागिन परी गहि स्रापन मेटाबाचस आबीरिम नागिन बाअचा निंग्हय कोहा भाइय्योस संकट नू रअदस। एन निंग्हय भाइय्योसिन बच्छबआ कादन नीन हूँ एड़पा किररा। राजकुमारस पखना गहि उजका सेना तुरू तंग्हय बैरीस मइय्या धावा नंज्जस दरा बैरी राजासिन कैदी कमचस। तंम्बस तंग्हय राजी गहि राजगद्दी नू उकयस। राजकुमारस गे नागिन परी ओंन्टा अकय सुन्दर पंडरू किचरी अतिका कूरका राजकुमारिन ओंन्दरा दरा बरचा। राजकुमारस अदिन एरनुम रइह केरस अरा मेज्जस इदिन ने तली ख़ने आद तिंग्गिया ईद ख़ेख़ेल परी हिक्के।
कोहा नंगदस बाचस सन्नी राजकुमारस संग्गे इदिन बेंज्जा चिआ। ई ख़ेख़ेल परी गहि नामे दया रहचा। नागिन परी तिंग्गिया की ईर गहि संग्गे मंज्जकन ती ख़ेखेल नू लग्गा-नखरना अम्बोरोओ। कोहा तंगदस जीत सिंघस आनियस एन कोहा राजकुमारन हिकदन एन राज गद्दिन अम्बदन चिअदन।
नागिन परी भरमांख़ा परीर गहि खिरिन तिंग्गिया। ई मजही नूम सन्नी राजकुमार गन्दुर सिंहघस अरा दया गहि बेंज्जा राजदरबार नू अकय धूमधाम तुरू मज्जा केरा।
दया,धरम अरा बेस नलख मल्ली गहि खंजपा खरा एम्बा मनी। बेस नलख ननू आलारिन धरमेस सम्भड़ादस। ख़नेम बाअचका र'ई दव करम दिम धरम हिके ।
Comments
Post a Comment