अंधरा-अंधरी राजा रानी
ओन्टा राजीनू अंधरा-अंधरी राजा रानी रहचर। आर अकय मोडोल (धनी किसिम) रहचर। ईर गहि ओन्टा इकला राजकुमारी मंज्जा। आद अगम सुन्दरही रहचा। राजास ईदीन बेंज्जा गे जोड़ी कुक्कोसिन बेद्दा-कुद्दा लगियस। आस गहि घोखनाभेसे कुक्कोर मल ख़खरा लगिया। कुक्कोस गे कुकोयन मोडोल (धनी भेसेम)एड़पा नू बीसा बेद्दा लगियस। कुक्कोस गे कुकोय लेखअम हूंँ। सुन्दर मन्ना रहचा। आस गोटा राजीनू कूद्दा-कूद्दा हारचस पहें तंग्हय घोख अरा तंग्हय कुकोय लेक्खा कुक्कोस सिन बेद्दा पोलस। हईर-गुइन के आस कुकोयनुम जोड़ी बेद्दा गे अम्बियस चिच्चस। कुकोय परदकी काला लगिया। इदीन बेंज्जना हूँ चाड़ रहचा ।
तम्बस घी बअचकन ती राजकुमारी तंग्हय जोड़ी-पाँति बेद्दा गे एड़पानती उरखा केरा। आद कुक्कोसिन बेद्दा-कुद्दा लगिया पहें आद हूँ पोल्ला बेद्दा। कुद्दनूम कुद्दनुम अदि गहि भेंट ओन्टा एड़ा ख़ापू कुक्कोस गने मंज्जा। आस अकय दु:ख (गरीब घर) एड़पानतस रहचस। कुक्कोस एड़ागे डहुड़ा खंड़ा मन्न मइय्या आरगियस। मन्नन ती एत्तो बीरी आस खतरस केरस। खतरकन ती ख़ेड्ड मुरकारा केरा। आस ए-का पोल्ला हेलरस। राजा बेटी आस गहि खतरकन ईरिया। अदि गे सोग्गे लगिया। तंग्हय रूपया-पैसा तुरू आस गहि दवा-दारू अरा सेवा नंज्जा। आस कोड़े मंज्जस केरस। आर एका बग्गे उल्ला गुटी संग्गेम रहचर। दुयोर नू प्यार मंज्जा केरा। राजा बेटी आसीन आनिया एंग्गन बेंज्जा ?आस आना किरताचस एन अकय दु:ख (गरीब) एड़पानता आलन हिक्कदन। एन राजघराना नू मल बेंज्जरोओन। रानी बेटी तंग्हय तंग्गियो-तंम्बासिन मेंज्जा। आर दु:ख (गरीब) एड़पानता कुक्कोस गने बेंज्जा गे मल गच्छरर।
कुक्कोस गहि नामे सत्यवान रहचा। आस ओंगहोन मुरूख बेमार मंज्जस केरस। ख़ेअना भेसे ख़ड़िदयस केरस। राजकुमारी घी नामे पावती रहचा। एकअम-एकअम तरते आस गहि बेमार मंज्जकन अक्खा दरा सत्यावनासिन एरा बरचा। आस ख़ेअना लेक्खे मंज्जस ख़ने धरमेस आसीन ओन्दरगे यमदूतारिन ताइयस। ईर बरचर दरा ईसीन होआ बेद्दियर। पार्वती आसिन होअनान ती मना ननी अन्नू हूँ आर मल मल मननर। आद ओहरा बिनती नना हेल्लरा ख़ने आर मेंज्जर ईस निंग्हय ने हिक्कदस? ख़ने आद तिंग्गिया ईस एग्हय आलस हिकदस। अन्नू हूँ आर मल मननर। आद आर गहि ख़ोख़ा मन्नन मल अम्बी, ख़ने आर बाचर नीन भगवानस गुस्ते मूंद ठो बरदान नेअय। निंग्हय नेअचकन धरमेस पूरा ननोस चिओस। आर गहि तिग्गिका मोताबिक आद मून्द ठो वरदान नेअचा। ओन्टा बरदान नू आद नेअचा की अदि गहि तंग्गियो-तम्बर गे कुक्को ख़द्दस मनदस नेकआ। एड़ता नू आर गहि तंग्गियो-तम्बस ,ख़न्न तुरू धरतीन एरोर ख़न्न कोलरोओ कालो। मूंदता नू सत्यावनस गहि तंग्गियो-तम्बा गर मोडोल मन्नर नेकआ धनख़ुजी ती बोजराअर कनार नेकआ। इबड़ा बरदान पूरा मंज्जा ख़ने यमदूतर सत्यावनासिन होआ हेल्लरर। ख़ने पावती राजकुमारी सत्यावनासिन होआ मल चिई। आर गहि ख़ेड्डन धरअर गोड़ लग्गी अरा ख़ोख़ा-ख़ोख़ा काली।आर बअनर निंग्हय गा नेअचका बरदान ख़खरा अन्नू हूँ नीन एमन एन्देर गे मल अम्बदी ? नीन चाईल कलय। आर खिसारर दरा बाअचर नीन धरमेस गुस्ते और ओन्टा बरदान नेअदन। ख़ने आद बरदान नेअचा दरा बअचा एंग्हय आलस उजदस नेकआ। धरमेस इदि गहि नाख़ता (4)बरदान हूँ ची चिच्चस। यमदूतर सत्यावनासिन अम्बियर। आस उजयस केरस। अक्कु गा राजकुमारी गहि खुसीन बअना दिम मल्ला! आद अलखा हेल्लरा। दुयोर रिझरनुम तम्हय-तम्हय एड़पा किरयर। सत्यावनस गहि एड़पा ता आलर धरमेस गहि बरदान तुरू मोडोल मंज्जर। आर गहि बेंज्जा धूम-धाम से मंज्जा। राजास गहि समधीस अरा कुक्कोस मोडोल एड़पानतर मज्जर।
पार्वती राजास गहि तंगदा मनुम हूँ आद घमंडी मल्ला,सादा बिचार गहि आली रहचा अवंगे आद दु:ख एड़पानता एड़ा ख़ापू कुक्कोस संग्गे बेंज्जरआ गे तेयार मंज्जा। आद तंग्हय भलाईन मुन्ध मल एरर तंग्गियो तंम्बर गे बरदान नेअचा। कुक्कोय गहि एड़पा गे हूँ बरदान नेअचा। अन्तले होरमीन ती ख़ोख़ा तंग्हय आलस गे। आलर गे इदि लेखअम सुद्दा मन्ना र'ई। अवंगेम बाअचर र'ई की धरमेस ई धरती नू होरमर गे जोड़ी-पाँती उइदस।
Comments
Post a Comment