12 न'उवास ,जोलहास अरा लकड़ा
ओन्टा पद्दा नू न'उवास र'आ लगियस। आस अगम तिखड़म - बाज आलस रहचस। अन्ने हूँ न'उवारिन न'उवा चतुर बा'अनर। उन्दुल आस पतडा कूटीनता एड़पा नू चुट्टी खंडा गे उरखस। मझी पतड़ानू आस गहि मुलाकात ओन्टे लकड़ा संग्गे मंज्जा। लकड़ा आसीन बा'चा एन निंगन मोख़ोन। ख़ने आस आनाकिरताचस नीन एंग्गन मोख़ा ओंगोय? एन निंग्गन ती कोहा लकड़न बझाबाचकन रअदन। एन निंगानुम गा बेद्दा लकअन पहें नीन ईन्ना ख़खरकी किरकी। आस गुसन दरही मूछ मुंडो बीरी एदआ गे कोहाले आईना रहचा। आस आईनन अदि गहि कुक्क गुसन होअर एदचस। लकड़ा गहि ए:ख़ आईना नू एथरा। आद घोखचा की मानीम ईस लकड़न बझाबाचकस रअदस। ईस गा एंगन हूँ बझाबओस। लकड़ा इलिचिया दरा आस गुसन ओहरा - बिन्ती नना हेल्लरा।नीन एंगन अंबा बझबआ। एन निंगागे अगम बग्गा सोना - रूपा चि:ओन। न'उवास मनचस केरस। अदि गहि कत्थन उइयस।
लकड़ा सोना - रूपा चि:आगे आसीन तंग्है एड़पा कालागे बा:चा गुच्चा भाई, नीन मुंधभारे - मुंधभारे ए:का। आ चालाक न'उवास बअदस एन मुंधभारे मनोन होले नीन धरओर दरा एंग्गन मो:ख़ोख़ोय चि:ओय। लकड़ा मुंधभारे एका हेल्लरा। लकड़ा मांदा गुसन अंडसिया दरा आनियाकला भाई नीन मांदा नू कोर:आ दरा आलोन बेद्दा। आस आनाकिरतार आनियस - ए:न मांदा नू कोर:ओन होले नीन एंगन पिटोय चि:ओय। अवंगे नीनीम कालाय दरा ओंदरय एन बड़ा मन्न नू अरिगकन रअदन। आद इलिचिका चलते मांदा उला कालर एका बग्गे रूपा अरा सोना ही चेनन (हार) ओंदरा बड़ा मन्न गुसन उय्या चि:च्चा। न'उवास मन्नन ती इतियस दरा धूती नू हेच्चस अलखनुम एड़पा किरयस।
उन्दुल पईरिम न'उवा ख़ाई तुसानती अम्म ओन्दरा केरा ख़ेसेर नू आद सोना गहि चेनन अत्तकी रहचा आदिन जोलहिन मुक्का ईरय्या अरा मेंज्जा अन बहिन नीन ई सोना गहि पूनन (चेनन) एकासते बिद्दकी? आद तिंगिय्या एंग्हय आलस पतड़ा तरता पद्दा नू चूट्टि मुंडा गे केरकस रहचस आबीरी आस गहि भेंट ओन्टे लकड़ा संग्गे मंज्जा। आ लकड़ा दिम ईस गे ई चेनन चि:च्चा। जोलहा मुक्का अगम लालची रहचा। आद न'उवा मुक्कन आनिया निंग्है आलस इकला पतड़ा तरा मुंडा कालोस आउलम एंग्है आलासिन हूँ हो:ओस। आद नितकी - नितकी मेना आर गहि एड़पा काला लगिया। मूंद रोजनू न'उवास पतड़ा पद्दा तरा काला हेल्लरस औलाम जोलहा मेत्तासिन हूँ संग्गेम ओ:च्चस दरा बड़ा गुसन केरर की मन्न मइय्या अरगियर। तनिक बेड़ा नू पतडान ता होरमी लकड़ा बड़ा मन्न गुसन उक्कियर दरा पंचायती नना हेलरर।
कोहा एकदा सरपंच रहचा आद तनिक कोहा - मेच्छा टंगरा नू उक्किया आद बाचा एन्देर गे पंचायाती मना लगी। ख़ने ओन्टा लकड़ा तिग्गिया नम्है मझहीनता ओन्टा लकड़ा आलस ती एलचर की होरमी हारन आसगे ची ची:च्चस। आख़नेम सन्नी लकड़ा आनिया एन रहचकन होले बाईय्यन कोल्लर गरजारोन दहकन अरा ख़ोलान पटकाअर की एलगताअर आसीन मोख़ोन चिओन दहखन। ननना लकड़ार बाचर एकासे गरजरोय दहकन - गरजार:अयतो? आ सन्नी लकड़ा अगम जोर से गरजारा। जोलहस इलिचियस की बड़ा मन्न ती सोझे सरपंचस (कोहा लकड़ा) गुसन खतरस। ख़ने न'उवास मन्न मइतेम बाचस अरे जोलहा कोहा लकड़ा नुम धर:आ । न'उवास गहि चालन मेंज्जर दरा होरमी लकड़ा भिड़िया धसान भोंगार की पतड़ा नू कोरचर। एका लकड़ा गहना चि:च्चकी रहचा आद बाचा नीम ई बग्गा रअदर अन्नु हूँ इलिचिकर।आलस गा ओन्टे इकला रहचस।
न'उवास जोलहा सिन बाचस ईरकय एन दिमाक तुरू नलख नंज्जकन ख़ने होरमी लकड़ा भोंगा। नीन बछारकय केरकय। मला होले आर निंग्गन पटोर मोख़ोर दहकन। हार चि:च्चा आदिन आईना एदचकन दरा ठकाचकन रहचकन। से ले एन्दरिम हूँ कामन नलखन बुद्धि तुरु ननना र'ई।
जोलहास खतरस ख़ने आस गहि कड़मा बिगड़रा केरा। आसिन न'उवास चोदचस दरा बड़े ससाइत नू एड़पा ओंदरस। आस एड़पा बरचस ख़ने तंग मुक्का ब:ई चेन कहाँ ओन्दरकय? आस अस्ता होरमी कत्थन ओन सिरेमतिम तिंगयस चि:च्चस। आद आनिया अक्कू अम्बके काला। लकड़ार निंगन मोख़ोर चिओर। एन बेगार हरनुम र:ओन।
ई खीरिन तिंग्गी की न'उवर चतुर - चालाक मन्नर अरा जोलहर बोक्का। होरमी नलखन दिमाक लड़ायके ननना र'ई।
Comments
Post a Comment