ए-ख़ मंक्खना

कुँड़ुख़ खोंड़हा नू केच्चका आलारिन मांड़नर चिअनर। अंतले नीकइम गा अउलम काम किरया नन्नर मलता नीकइम गा 10 रो-ज,12 रो-ज, 15 रो-ज मलता ओंद चन्दो ख़ोंख़ा काम किरया नन्नर। एकासे पया र'ई अन्नेम। ई काम किरया नन्ना अउलम ओंड्डका-मोक्का ख़ों-ख़ा ए-ख़ मंक्खना गही ने-ग मनी। तो ई ने-ग एन्ने मनी:-एड़पा उला ओंटा लोटा नू अम्म निंदअर अदिन अतख़ा ती (मुखन) मुन्धअर हेअनर अदि मंइय्या ओंटा टट्ठी नू बिल्ली दगअर उइनर। दरा ओन्टा ख़े-रन एड़पा उला बलिन मुच्चा की चराबअनर।ई बीरिम जोक्क मुक्कर ओंटा लुहाठी,बज्जा दरा तीन ठो दिगहा कडिरकन होआ की उसंगी अरा तांतरन अस्सनुतिम मसड़ा तरा कानर। मसड़ा ती जोक्क गेच्छम आ कडिरकन ओंद चोक्ख हेअर कुम्बा कमना लेखआ इजतअनर दरा मंइय्या आ बज्जन चिअनर ईद सुपट कुम्बा बेसे बन'ई। अन्तले आ कुम्बन दगनर चिअनर। कुम्बा ओला हेलर'ई आ बीरिम अबड़ा मुक्कर केच्चका आलर घी नामे पिंज्जर जोड़-जोड़ ती मून्द बेर एन्ने बाच-बाच मे-ख़नर बरके फलना/फलनी निंग्हय कुम्बा ओ-ला लग्गी। एन्ने नंन्जका ख़ोंख़ा आ अड्डा ती होरमा मुक्कर उसांगिन अस्सनुम एड़पा किरनर।एड़पा बरअर ए-रनर का बली ऊदका र'ई होले ईर तिसगआ गे आननर। उला ता आलर मेन्नर अपन की बिरन। इदि गहि उतारा बहरी ता मुक्कर चिअनर अपन। एन्ने मेनर एड़पा ता आलर आ चराबाचका ख़े-रन एन्देरइम ती कुल्लनर चिअनर दरा बलिन तिसगअनर। नन्ना उल्ला पइरिम आ ख़े-रन बली नू पटकअर पिटनर दरा सुड़ी बीतनर। बिच्चका ख़ों-ख़ा असन रऊ होरमा आलर अदिन ख़टरअर ओन्नर मो-ख़नर।