बिही खेदना

     आलर गे भइर दुक्खे - मल बर'ई । दुक्खे-सुक्खे गा ख़े-ख़ेल नू रऊ हुरमी जिया जउँत गेम बर'ई। अन्ने गा जिनगी नू सुक्खे का दुक्खे र'ई दिम । होरमर गेम ओंद घड़ि सुक्खे तो ओंद घड़ि दुक्खे बरनम र'ई । पहें एकअम- एकअम बेड़ा पकम कोड़हे दुक्खे बर'ई एका अत्तु का आलर संमढ़रअम पोल्लो हेलेरनर। एका से का पद्दा नू ओबा बरना,अड्डे-मेक्खो गे खुरहा मन्ना मलता एकअम पद्दा नू एकअम ओरती ही रकस ख़द्द मन्ना।तो एन्ने मलदव मन्नन मलता दुक्खेन तरकूटी नन्ना गही कुँड़ुख़ ख़ोंड़हा नू ओंटा चालो र'ई अदिनुम बिही खेदना मलता रो-गे खेदना बअनर। पद्दा नू एकअम लेखआ मलदव दुक्खे मना हेलरा होले कुँड़ुख़र आ मलदव दुक्खेन तंगआ पद्दा ती तरकूटी ननर परपंद दव ती जिंनगिन खेपआ बेद्दनर। 

     बिही खेदना गहि एन्ने रीत र'ई का एकअम पद्दा नू कोड़हे दुक्खे मना लगी मलता एकअम ओरती ही रकस ख़द्द मंज्जका इदा तो कुन्दुरका ख़द्द गहि कुन्दुरआ ख़नेम कोहा-कोहा पल्ल कुन्दुरका र'ई। कुक्क नू मरग र'ई मलता ख़द्द गहि ख़ोला र'ई । होले आ पद्दा ता होरमा मुक्कर नयगस गहि एड़पा नू जुमा मंन्नर। आ ख़ों-ख़ा धरमेस ती गोहरारनर, पुजा ननर नन्नर पद्दा कानर। गोहरारओ बीरी बअनर का ए धरमे एम्हय ती एन्ने एन्देर मोड़(भूल) मंज्जा का एमती एन्देर एन्ने पाप मंज्जा जे इन्ना एम्हय पद्दा नू एन्ने मलदव दुक्खे मना लगी। ए धरमे एम्हय अक्का-बलकन नो-ड़ा गे नीनिम गा रअदय। ए-म एन्ने दुक्खेन पोल्लोम संमढ़आ अवंगेम इन्ना ई दुक्खेन पद्दा ती ओत्थोरअर तरकूटी नना लगदम। इन्नातिम एन्ने दुक्खे एमा अमके चिआ।

    एन्ने गोहरारका ख़ों-ख़ा पद्दा ता हुरमी एड़पा ती ओरोत-ओरोत मुक्कर अखड़ा नू ख़ों-ड़ोरनर अन्तले नयगनी बर'ई। नयगनी ही ख़ो-ख़ा होरमा मुक्कर हेद्देता एकअम नन्ना पद्दा कानर। नन्ना पद्दा कालर अखड़ा नू ओक्कनर। असन आ पद्दा ता नयग, पुजार दरा मतोसिन एड़नर। इबड़र गहि बरचका ख़ों-ख़ा पिटरी अट्टनर,ओकतअनर, अम्म चिअनर,हुका चिलम चिअनर। इवंदा बेड़ा गे पद्दा ता अउरहो आलर जुमुरनर कानर। अन्तले एका पत्त नू बिही खे़दना बरेचकर रअनर अदिन ख़ोट्टर की तेग्गनर। अदिन आ पद्दा ता नयग महतोर इंजिरनर। आ ख़ों-ख़ा अखड़ा ती चोअर की हुरमी एड़पा ती जोक्क - जोक्क ख़ेस्स ऊजनर की तंगआ पद्दा किररनर। किररका ख़ों-ख़ा अदिन बीसन जोक्क अरखी ओन्दोरनर दरा ख़े-ख़ेल नू तपावन चिअनर अन्तले ओन्नर।

     अउलम बीड़ी पुत्तका ख़ों-खा जों-ख़र गोट्टा पद्दा नू हँकवा चिअनर का इन्ना माख़ा ख़ुड़ती ओंड्डका ख़ों-ख़ा ओन्टा-ओन्टा अड़िन तंगआ चाली नू उइनर नेकआ दरा माख़ा बीरी ने हूँ बहरी अम्मबन उरुखनर नेकआ। ख़ुड़ती ओंड्डका ख़ों-ख़ा होरमर चहे आर एकअम जातियर रओर तंगआ चाली नू ओन्टा अड़ि नू जोक्क चिन्द सजअर हुम्बआ उइनर चिअनर। अदहा इदही माख़ा बीरी जों-ख़र अखड़ा नू उरखर थोथा मनर की (कया नू ओंटा मे-र हूँ मल र'ई/बोला जाए तो निर्वस्त्र रहना) ओंटा - ओंटा ढइमसा मलता मुगरन धरअर पद्दा कूटी नू बरनर। आर मजही नयगस हूँ रअदस आस महरा बनदस। आस ओन्टआकेम घटिन मलता ठरकिन टंगेरदस। अक्कु इबड़र तरकूटी- तिम हुरमी चाली ता अड़िन लवनुम ख़ुट्टनुम पद्दा ती उरुखनर कानर। ई मजही ने - का हूँ मल्ला कच्छनखरना। बई ती नीदि आँ-उँ,आँ-उऊ भइर बओर। पद्दा ती उरुखका ख़ों-ख़ा जों-ख़र तंगआ पद्दा गहि सिंया गूटी कानर। असन अबड़ा ढइमसा,मुगरोन अम्मबनर चिअनर दरा ताम जोक्क गेच्छा पच्छलिम किररनर। पद्दा ती तरकूटिम मनर पोखरा नू मलता ख़ाड़ नू एमअर अखड़ा बरअर तंगआ-तंगआ किचरी - डोड्डोन अन्तरनर पुन्दुरनर। 

     नन्ना उल्ला पइरी बीरी हुरमी ती मुन्ध चाली-बलिन ए-गनर दरा ईगिका लुंडन आ माख़ा ता ख़ुट्टिका अड़ि गहि नखल नू उइनर।अदिन हुरमी एड़पा ता ओरोत मुक्कर होअर की पद्दा कूटी तरा (एका तरा माख़ा बीरी जों-ख़र ढइमसा दरा मुगरन ओत्थोरका रअनर) उरखर ख़ों-ड़ोरनर । ई ख़ोंड़हा नू नयगनी महरा मुक्का बनई। आदिम मुन्ध-मुन्ध काली अदि गहि ख़ों-ख़ा-ख़ों-ख़ा होरमा मुक्कर आ लुंडा-भंडन कुम्मा की आ सिंया अड्डा नू कानर एकसन का माख़ा जों-ख़र मुगरन अम्बिकर रअनर। असन अंड़सर मुक्कर गोहरारनर ए धरमे ए-म एम्हय पद्दा ती हुरमी रो-गे-पापेन एरर-नेप्पर ओत्थोरकम। इन्ना ति एम्हय पद्दा सलसंत रआ नेकआ एकअम लेखआ खिलपइत अम्मबन बरआ नेकआ। अन्तले आ लुंडा-भंडन सिंया पक्खे पांती-पांती उइनर चिअनर असतिले किरर होरमा मुक्कर पद्दा बहरी-बहरिम ख़ाड़ मलता पोखरा तरा एमआ कानर। एमअर पद्दा कोरनर।

     एन्नेम नन्ना उल्ला नन्ना पद्दर हूँ ई रीतन नन्नर दरा आर हूँ नन्ना पद्दा तरा ओत्थोरनर चिअनर। एन्ने नन्ते-नन्तेम मला एकसन अंड़सतअनर चिअनर।