चिंद्द कें-सना

     कुँड़ुख़ खोंड़हा ता एकअम आलर पच्चिका ती,बेमार ती मलता एकअम मलदव अकलक ती खेएनर होले आरिन कुँड़ख़र ओलदअनर मलता मसड़ा नू माड़नर चिअनर। ई मजहीनुम चिंद्द-के-सना ने-मनी। आद ई लेखआ मनी-ने-खअय दिम केच्चका ख़ों-खा आ एड़पा ता आलर चींख़ा-ओलख़ा हेलेरनर। आलर गहि चींख़ना मेनर किम पद्दा ता आलर अख़नर कानर का फलनस गहि एड़पा तर नीकइम नोकसान (मृत्यु) मंज्जर। एन्देर गे का कुँड़ुख़ खोंड़हा ता डंड्डी नू बेड़ासिरे लेखअम रागे गा र'ई दिम,कुँड़ख़र गहि चींख़ना नू हूँ जुदा-जुदा रागे र'ई। एकासे का:-

       ने-कआनुम पसनर होले ननअम चींख़नर,

       बेंज्जा चींख़ना ही ननअम रागे मनी अरा

       केच्चका चींख़ना ही नन्ना रागे र'ई। 

  अवंगेम कुँड़ुख़र अख़नर कानर का एन्देर दसा र'ई। तो आलर ही केच्चका ख़ों-ख़ा चींख़ना-ओलोख़नन मेनर पद्दान्ता आलर आ एड़पा तरा जुमुरआ हेलेरनर। जुमुरका ख़ों-ख़ा आरिम केच्चका एड़पा ता हेद्दे-गेच्छान्ता पाहियारिन हाल-खबइर चिआ कानर। जोक्क आलर माड़ा गे गड्डी अरख़ा कानर अरा जोक्क आलर सरहा कमनर। मुक्कर मड़न एमतअर-ख़ज्जर इसुंग नन्नर। एन्ने मंज्जका ख़ों-ख़ा केच्चका मड़न सरहा नू मड़ाबअनर। तेंग्गा केरका पद्दा तरती पाहियर बरनर आ ख़ों-ख़ा मड़न मसड़ा तरा होआ गे ओत्थोरनर। मड़ा गहि ख़ों-ख़ा-ख़ों-ख़ा असता होरमा आलर खरा दुक्खे सारनुम मसड़ा तरा कानर। मड़न मसड़ा होआ हेलेरनर आबीरिम अगर एड़पा उलम केच्चकर रअनर होले जिया केरका आ अड्डानुम चिंद्द के-सनर की बहरी ती बलिन मुच्चनर चिइनर। आ बलिन,ए-गूटी मड़न माड़र की मल किरनर आ-गूटी ने हूँ मल तिसगअनर‌।‌‌ मड़न माड़िका ख़ों-ख़ा होरमर ख़ाड़-पोखरा तरा उधरारनर दरा एड़पा किररनर। आ ख़ों-ख़ा बलिन तिसगअर ए-रनर का आ चिंद्द कींसका अड्डा नू इन्दरइम चम्मबी र'ई का मल्ला। नेरर, बेरख़ा,आल,ख़े-र मलता इन्दरइम चम्मबी र'ई होले आलर ओड़ोगनर का ई आलस/आली मलदव ती अरदा अरगी पूरनुम केच्चस/केच्चा। चिंद्द के-सना अड्डा नू एन्देर चम्मबी हूँ मल र'ई ,मे-र तागरका चिन्हा र'ई होले ईसिन मलता इदिन धरमे दिम ओच्चा बअनर।