कोंहा बेंज्जा
कोंहा बेंज्जा कुँड़ुख़ ख़ोंड़हा ता अकय महबा ने-ग धरम तली। इदिन कुँड़ुख़र पचगी बेंज्जा,पचवाल बेंज्जा अरा हड़बोहा हूँ बअनर। ई ने-ग अगहन चन्दो नू मनी। ए-न ईसन बांस जड्डी ता कोंहा बेंज्जा पत्त नू टूड़ा लगदन।
कोंहा बेंज्जा अगहन अरिगका ख़ों-ख़ा नय (9)रो-ज नू मनी। इदिन्ती मुन्ध उल्ला पद्दा चो-दना मनी। पद्दा चो-दना उल्ला पद्दा ता पंचर ख़े-र धरनर। पद्दा नू नेखय ख़े-र र'ई आर ओरतर गही ओंटा ख़े-रन एकदा का पुजा नन्ना जोक्खा र'ई अदिन धरनर। पूजा नना गे सर(7)ठो ख़े-र लग्गी। धरमेस गे पंडरू,गंवादेवता गे ख़ें-सो,चाला पच्चो गे मोख़ारो,दरहा गे मला, पचवालर गे तम्बाही,सिंया-भुइंया गे कसरी रंग गहि ख़े-रन ओंटा-ओंटा चराबअनर दरा एड़बनर। हुरमी ती मुंज्जा नू ओंटा एकअम रंग गहि ख़े-रन चराबअनर पहें अदिन मल एड़बर अदि गहि कुक्कन ख़ेक्खातिम अइंठअर किच्चनर चिअनर। ई नलख ओंटा टिपिचका अड्डा नू मनी। ई अड्डा नू मून्द (3) बे-र पुजा मनी :-(1)खरा पुजा (2) अगहनी (3)हरियारी पुजा। इबड़ा पुजन नना गे नयगस अरा पुजरस गुसते ओंटा-ओंटा झरा अरा ओंदिम पइला तीख़िल लग्गी।
पुजा नंज्जका ख़े-रन कमअर तीख़िल संग्गे टहरी बीतअर ओन्नर मो-ख़नर। ख़ंदेर माख़ा बीरी तूरियस पद्दा नू (तीन)मूंद बे-ड़हा ढो-ल अस्सदस। अखड़ा ती ओ-र ननर पद्दन डेब्बा किररदस। एन्नेम जोक्क गंहड़ी-गंहड़ी नू अस्सदस। ढो-ल अस्सो बीरी आस ख़ों-ख़ा मल ए-रदस । एन्ने ढो-ल अस्सो बीरी होरमा पचवालर नलनर बअनर। ई पद्दा चो-दना पुजा नंज्जका ख़ों-ख़ा नीकइम हूँ पद्दा ती बहरी मल कानर। अउला पद्दा ता आलर इसुंग गुट्ठी हूँ मल ख़सरनर,सिंगर-पतर मल मन्नर।
नन्ना उल्ला पद्दा ता हुमी एड़पा नू दाली मंड्डी बीतनर। मंड्डी बिच्चका ख़ोंख़ा ओंटा-ओंटा सोड़ा नू ख़ोल्लनर। आ मंड्डी नुम कुंड्डी होआ की कानर। तबहेम नीकइम मंड्डी ओन्नर। लोहाड़ी मनी होले तूरियस अखड़ा नू ढो-ल अस्सदस। ढो-ल सड्डनन मेनर की होरमर कुंड्डी काला गे सपड़ारनर। हाँ ओंटा कत्था ईद र'ई का उल्ला पइरिम सन्नी तूड़ ता जों-ख़र पद्दा ती कुंड्डी काना डहरे तरा हुरमी झंड्डन पांती-पांती गड़नर। अत्तरा आ बछर एका एड़पा ती मड़ा उरूखकी र'ई कंड़सा (चुक्का) कमनर (ई कंड़सा मानी बेंज्जा ता कंड़सा लेखआ मल र'ई) मुन्ध गा जोक्क कुँड़ुख़र मड़न बस्सा हूँ लगियर। तो एन्ने बस्सिका आलर गहि ख़ोचोलन चुक्का नू सजनर। अन्तले आ चुक्का नू ओंदका तीख़िल, दुब्बा घांसी अरा तम्बा ढिबन सजनर।
ढो-ल अस्सुस अस्सनुम-अस्सनुम कुंड्डी काना डहरे तरा बरआ हेलेरदस आ बीरी मुक्कर कोच्छा नू ओंदका तीख़िल,मासी अरा अरखी होअर मसड़ा नू छिटनर अरा अरखिन असन-इसन चुरख़अनर। जोक्क मुक्कर आ खुल्लका मंड्डिन बउगी नू कुम्मा-कुम्मा कुंड्डी काला गे उरूखनर। ने-खय एड़पा ती मड़ा उरूखकी र'ई आर गहि एड़पा ती आ चुक्कानुम पूंप ती झबरअर एंड़-मूंद झना मुक्कर नलतअनुम उरूखनर। इत्तरा जों-ख़र झंड्डन ताघरतअनुम चों-गनर। होरमर नलनुम बे-चनुम कुंड्डी कानर। कुंड्डी अंड़सर कुंड्डी नू आ चुक्कन पटकअनर चिअनर दरा होच्चका मंड्डिन होरमर मून्द-मून्द गोटंग पतंगली नू ख़ट्टनर अदिन सन्नी-सन्नी ख़द्दर ओन्नर।
कुंड्डी ती किरर महतोस गही एड़पा होरमर उधरारआ कानर। असन केच्चका एड़पा ती ओंटा झरा अरा इसुंग लग्गी। ई झरन पीसर गठड़ा अतख़ा नू अम्म ओथोरनर। आ ख़ों-ख़ा नू तूरियस अबड़ा ईसुंगन कट्टी इसुंग ओंदा बाच-बाच गठड़ा अतखातिम ख़ेक्खा-ख़ेक्खा नू चिअदस अदिन ख़सेरनर अन्तले झरन ओन्नर। इदिन कुंड्डी एत्तना हूँ बअनर।
Comments
Post a Comment