असुरर अरा लोधहर
धरमेस ख़ेख़ेलन आलर गे होरमी उजना-ओक्कना गहि आलोन चिअर झबराचकस रअदस। आलर गे धरमेस गहि ओहमा नन्ना अकय चाड़ र'ई । ईर गे आस गहि कत्थन जिया ती उइना र'ई । पहें आलर धरमेसिन मोधरनर कानर आस गहि कत्थन मल मेनर। तमानुम आलर धरमेस ती कोहा बुझरनर। आर पापी मनर ख़ेख़ेलता आलारिन दु:ख चिअनर आस गहि कत्थन अरा बरजाजकन मल मेननर।
ई ख़ेख़ेल नू दोय एँड़(11) असुर भाइय्योर अरा दोय मून्द (13) लोधहर रहचर। ईर पखंडी मंज्जर केरर। तमानुम धरमे बआ लगियर। ख़ेख़ेल नू नेकअनुम हूँ मल बुझरआ लगियर। धमेस गहि आनताइकन हूँ मल मेना लगियर। ईर उल्ला-माख़ा चपूवा तुरू पन्नन धुकआ लगियर। चपूवा गहि धुंगिया ख़ेख़ेल अरा मेख़ा गुटी काला हेल्लरा। इत्तू धरमेस गहि हकुड़-घोड़ो हंखराज-पंखराज दाना मो:ख़नन अरा अम्म ओनन अम्बिया चिच्चा। घोड़ो-हकुड़ कुदना-नुंगनन हूँ ढिलचा। अक्कु धरमेस घोड़ो नू एकासे अरगोस।
अवंगे धरमेस ढिचवन बरजा गे तइय्यस। ढिचवा आर गुसन बरचा दरा आनिया अना हरो भाइरो नीम उल्ला न माख़ा पन्नन धुकनन अम्बा। गोटा ख़ेख़ेल अरा सरगे मोसगा (धुंगिया)तुरू निंदिया केरा। धरमेस गहि हंखराज-पंखराज (हकुड़) घोड़ों दाना-पानी मोख़ा ओना अम्बिया चिच्चा। ख़ने आर आना किरताचर :- दोय एँड़ असुरम अरा दोय मून्द लोधरम उल्ला-माख़ा पन्नन धुकदम। धरमेस नेतलदस। ईमिम गा धरमे हिकदम। एन्ने बाअर बअचर धरआ हरो ई ढिचवन। नम्हय गुसन ईद तिखड़म एदआ लगी एन्ने मेनर की ढिचवा भोंग्गा हेल्लरा। आर बाआ हेल्लरर एम पन्नन मोख़दम अरा चिलिंगिन पीतदम। आर अदि गहि ख़ोलन संड़सी तुरू धरचर दरा कोइला चिंदन अदि मंइय्या छिटचर चिच्चर अरा कुदाबअचर। सेहेले आद मोख़ारो मज्जा अरा आदि गहि ख़ोला बुचा र'ई काला नीन धरमेसिन तेग्गके चिअके।
अन्तले धरमेस केरकेट्टन ताइय्यस। केरकेट्टा हूँ आरीन बरजाचा आर मल मेंज्जर। आर बआ हेल्लर धरमेस ने हिक्कदस। एमिम गा धरमे हिक्कदम। एन्ने बअर अदि गहि नरटिन संड़सी तुरू धरअर अदि मइय्या चिंदन तपआ नंज्जर चिच्चर दरा आनियर कला नीन निंग्हय गोलासिन तेंग्गके चिअके। चिंद छिटचकातिम अदि गहि छाती पंड़रू मज्जा। आर कत्थन मल मेन्नर ख़ने धरमेस खसरा - खुसरूस गही देह काया ओच्चस दरा ख़ेख़ेल नू इत्तियस आस मुन्ध तुसा डहरे नू केरस दरा अम्म उन्दरू असुरर अरा लोधअर मुक्कर गुस्ते अम्म नेअचस। आर बाअचर एम दोय एँड़ असुरम अरा दोय मून्द लोधरम गहि मुक्कम तलदम। एम पन्नन मोख़दम दरा चिच्च-चिच्च एरेख़दम अर्रा-फर्रा आरलग-फारलग किचरिन कूरदम अरा फुनिगम पितदम। एम निंग्गगे अम्म चिओम! मल चिओम।
आर गुसानुम ओन्टा रंडी पच्चो रहचा।
Comments
Post a Comment