खेरहा अरा लकड़ा

     ओन्टा अंज-खंज कोहा पतड़ा नू लकड़ा रआ लगिया आद टोंड़ग गहि राजा रहचा। अदिगे उज्जा -ओक्का गे नितकी ओन्टा मला ओन्टा किंको मन्नादिम चाड़ मना लगिया। आद बेद्दा-मोख़ा गे उरखा लगिया आबीरी नेकन एरो आरीनुम धरअर की मोख़ा चिआ लगिया। उन्दुल इदिगे खेरहा (लंभहा) गहि तंग्गियो तंम्बर ख़खरर केरर। लकड़ा तंग्गियो तंम्बा इबड़ारिन धरचा दरा मोख़ा चिच्चा। ई ख़द्द लंभहा गे अकय दु:ख अरा सोग्गे मंज्जा। ईद तंग्गियो तंम्बस गहि बदला लकड़ा ती होआ गे घोखआ हेल्लरा। एन उन्दुल न उन्दुल ईस गुस्ते बदला होओन।

     खेरहा ओंग्होन पतडानता होरमी किंकोन ओन गुसन एड्डा (बुलाया)दरा बइसकी ओकतचा दरा बअचा : - ई लकड़ा गे नितकी ओन्टा मला ओन्टा किंको चाही। होरमर नाम एलचर की भोंगदत का कूद्दत पतड़ान ती कूटि उरखदत। ने इकला धरओत अदि गहि ठार - ठिकाना मल्ला। नाम एन्देर गे एन्ने मल ननोत नाम पाली ख़ट्टोत चिओत। इदिन आर होरमरदिम पत्ताचर। आर पाली-पाली लकड़ा गुसन अंड़सा लगियर। लकड़ा गे हूँ ईर गहि नेवई दव लगिया। आद अक्खा केरा की अक्कु गा एंग्गा गे बेगर नलख नंजकनतिम ओना-मोख़ा गे ख़खरओ। होरमी किंकोर पाली -पाली लकड़ा गुसन अंड़सा लगियर आद अलखनुम पिटा मोख़र की डेम-डेम रआ उड़अर मांन्दा नू कालर निचोत ख़न्दरआ लगिया। किंकोर बरआ लगियर अवंगे लकड़ा गे कूदना-बेद्दना मल मना लगिया। लकड़ा टोंड़ग नू कूद्दो होले ने हूँ मल एलचा लगियर। आर निरदन्द कूद्दार-कूद्दार बेद्दा-मोख़ा हेल्लरर। एलचना घी कत्था दिम मल रहचा।

     उन्दुल खेरहा गहि पाली मंज्जा। ईद लकड़ा गुसन काला गे मंदान ती उरखा दरा डेगनुम-नलनुम काला लगिया। ओंगहोनगा आद भोगनुम काली मला तो थिराअर ख़ान्दर'ई ‌‌।आद जाइन बुइझ के लकड़ान खिसाबआ लगिया। खिसारकन ती बुधही चाड़े नलख मल ननी। एन्नेम बिचनुम-नलनुम काला गे एका बग्गे समय लगिया। ढेर बेड़ा नू कानन एरर दरा तंग्हय संग्गेर अरा ने ख़खरी आरीम मेनार एन्देर गे नीन ईवन्दा देरी नना लगदी,लकड़ा मल खिसारो का? ख़ने आद आनी लकड़ा एंग्गन एन्देर ननो। एंग्गन मल इलची एन्देर ई लेक्खा एका बग्गे बेड़ा कटिया केरा। बीड़ी हूँ मुलख़ा काला हेल्लरा। इत्तरा लकड़ा कूल कीड़ान ती छटपटारा हेल्लरा। अदिन धीरा बअना सुरू नंज्जा। खिंस तुरू अपे ती बाहरी मना लगिया। लंभहा रसे-रसे लकड़ा गुसन अंड़सिया। लकड़ा अदिन केबा हेल्लरा ख़ने आद तिंग्गया की एग्हय जिया जोक दव मल्ला। डहरे नू ओंन्टा दोसरा लकड़ा छेकचा दरा पिटा बिद्दिया ख़ने एन भोंगकन दरा निंगुसन बरचाअन। आ लकड़ा बआ लगिया एनीम लकड़ा बेलन तलदन। एका से बओन देरी गा मंज्जा !

     इत्तरा लकड़ा कूल कीड़ा अरा खींस तुरू पागलर लेक्खअम मंज्जा केरा ख़ने लकड़ा बाअचा गुचा एदआ एग्हय राजी नू एका बेलस बरचकस रअदस। आद खेरहा गहि ख़ोख़ा भोंगनुम केरा ख़ने लंभहा अदिन इन्दिरा गुसन ओच्चा दरा ख़ेख़ेल हुम्बआ ननर एदताचा। लकड़ा गहि एख़ कूबी नू एथरा।

     आद अदिन पिटा खतरी कूबी नू झंगूड़ ले डेगचा चिच्चा कूबी अगम गड्डी रहचा से-ले उरखा पोल्ला दरा अइय्यम केच्चा केरा। 

   आलर गे खेरहा लेक्खअम होसियार चतुर मन्ना र'ई । लकड़ा लेक्खअम बोका अरा अहंकार मल मनना चाही।