पचगिस अरा पच्चो

     ओन्टा पद्दानू पचगिस अरा पच्चो रहचर। अरा खुल-खुल पच्चिका रहचर। ख़द्द-ख़रर मल मंज्जर ख़ने पच्चिका बेड़ा नू आरिन सहाड़ा चिऊर ने हूँ मल रहचर। पचगिस नितकिम तेम्बा काला लगियस। तिम्बका रूपया-पैसान अरा एन्दरअम जिनिस ख़खरा लगिया अदिन ओंदरअर की एड़पा नू पच्चो गे चिआ लगियस। पच्चो काठी झुरिन बेद्दर की मंडी-अमख़ी बीतआ लगिया। मंडी बिचका ख़ोख़ा दुयोर ओन-गुसानुम नगद ले ओक्का ओना-मोख़ा लगियर। उन्दुल पच्चो आसीन अराबअचा दरा आनिया पचगी नितकी गा नाम दाली मंड्डी ओनदत से-ले नीन ईन्ना असमा मोक्खा गे आटा गुंडा तेम्बा दरा ओन्दरके । पचगिस बअचस हई पच्चो एन ईन्ना जुन-जुना आटा गुड़ा तेम्बोन की ओन्दरोओन। मला तो आबदा तीख़िलन नेओन।

     पचगिस नितकिम ता लेक्खे तेम्बा गे उरखस। आस दूरा-दूरा कुद्दयस। ने गा ख़ेस चिआ बेद्दनर ने गा कोदय अरा ने गा पैसा चिआ बेद्दनर। आस नेख़य भीखन हूँ मल ओच्चस। आस गे तो गेहूँ गहि आटा गुण्ड़ा मला तो आबदा तीख़िलन होअना रहचा। तंग पच्चो इबड़ा नुम ओंदरआ गे आनकी रहचा। आदिगे असमा मोख़ा तुक्की रहचा। कूद्दनुम-कूद्दनुम ओन्टा उरूब एड़पा नू भीख नेआगे अड़सियस। आर मंडी मल ओनर की अदि गहि अड्डा नू असमा मोख़ा लगियर। आ कोहा एड़पानति तनी-मनी आबदा तीख़िल ख़खरा। अदिन ओन्दरस दरा पच्चो गे चिच्चस। अबदा तीख़िल तनिम रहचा। पच्चोन इदिन ओपचा दरा पड़तअचा नू कस्सा। कस्सा दरा असमा मेक्खा हेल्लरा। अबदा तीख़िल जोक्किम रहचा अवंगे मून्द ठो गोटा असमा बनचा। 

     पचगिस बहरी उरखा केरकस रहचस।आस एरख़ियस की एड़पा किरयस ख़ने पच्चो बआ हेल्लरा एन एँड़ गोटा असमन मोख़ोन पचगी।नीन ओन्टा असमा मोख़ोय। पचगिस आनियस एन दूरा-दूरा गोट्टा पद्दा नू कुद्दकन एन एँड़ ठो गोट्टा असमा मोख़ोन। आर दुयोर गहि कहा सुनी मना हेल्लरा। गोट्टा उल्ला मुंज्जरा पहें ने हूँ ओन्टा असमा मोख़ागे राजी मल मंन्जर। तब आर ओन्टा सरत (सर्त)उय्यर दुयोर पिटरिन डबरोत दरा चूतोत। ने आगे चोओर आर ओन्टा असमा मोख़ोर अरा ने ख़ोख़ा चोओर आर एँड़ ठो गोट्टा असमा मोख़ोर। भर उल्ला भुंजरा केरा। एकम बीरी पचगिस पिटरीन चालख़दस की नूखूर- नूख़ूर एरदस पच्चो गा मुन्ध चोच्चा हुताई। मल चोच्चकी रई ख़ने पिटरी तुरू कुलूरदस। अन्नेम पच्चो हूँ ननी एनेम नन्नुम उल्ला- मांख़ा मुंज्जरा केरा। एँड़ ठो गोटा असमा मोख़ना गहि फेराक नू हूँ मल चोच्चर। पचगिस तेम्बा हूँ मल काला उगियस। 

     एका पद्दा नू पचगिस तेम्बा काला लगियस आ पद्दा नू ओन्टा कोहा बेलस रहचस।  पचगिस आस गहि एड़पा नू नितकी तेम्बा गे काला लगियस। एँड़-मूंद (2-3) उल्ला पचगिस बेल एड़पा नू तेम्बा मल केरस अवंगे आस घोखआ हेल्लरस आ दुयो पच्चो-पचगिस खुल-खुल रआ पच्चिका रअनर,मना ओंग्गी आर जियान मंज्जर होत'ई। एन्ने घोखचस दरा तंग्हय कमियारिन एरा गे आनियस। कमिया जोंख़र कानर दरा एरनर आर दुयोर कींदा गहि पिटरि नू झपराअर चूतकर रअनर। आर घोखचर ईर केच्चर केरर का? जोंख़र किरयर दरा बेलासिन ई कत्थन तिंग्गियर। आर बाअचर पच्चो-पचगिर केच्चर केरर। 

     बेलस आरीन तिगाबअचस काला नीम आस गहि एड़पा। एड़पा नत काठ-बाँसन उझड़ाअके दरा सरहा कमअर चेड़के दरा बसागे मसड़ा होअके। एड़पा ता काठन होअर ख़ोपके दरा आरीन ख़ुपका कंक्क मइय्या उय्यर चिच्च ती उतगके चिइके। जोख़र आस गहि तिंग्गिका लेक्खेम नंज्जर। दुयोरिन कंक्क ख़ुपका मइय्या उय्यर अरा चिच्चन थुतकाचर कंक्क लाघरा हेल्लरा आबीरिम इबड़र चोच्चर दरा बआ हेल्लरर एन एँड़(2)गोटान मोख़ोन। आ जोख़र एलचर भोगार केरर आर घोखचर केच्च-का आलर नाद मंज्जर। ईर नमानुम मोख़ोर। इबड़ा कत्थन आर बेलासिन तिंग्गियर। आरिन बेलस एड़ताचस। 

     पच्चो-पचगी इबड़ा रिन बेलस गुसन बरचर दरा तंग्हय खिलपाइत कत्थन तिंग्गियर। बेलस सोगारस दरा आ पच्चो-पचगिरिन तंग्हय राजदरबार नू उय्यस। आर असान निचोत रआ हेल्लरर। आसन आर ढेर उल्ला उज्जियर।