एँड़ झन भाई - बहिन

     ओन्टा पद्दानू सन्नी-सन्नी एँड़ ठो भाई-बहिन रहचर। भाइयोस कोहा रहचस अरा बहिन सन्नी। ईरीन तंगियो-तंम्बा सन्नी नुम अम्बियर दरा केच्चर केरर। ईर दुयोर चोन्हा ती रआ लगियर। उन्दुल ईर पिटरिन अट्टार ओन्दका ख़ेसन ख़ायदा लगियर। आबीरीम कउवा उढ़ियारनुम बरचा दरा ओन्टा पंज्जका तेलन खताअचा चिच्चा। ईर पेत्तर दरा दुयोर एम्बा-एम्बा ख़टरर मोख़र। मोक्खर तले अखार की पतड़ा नू तेला पाना लगी। उन्दुल ईर पंज्जका तेला गे पतड़ा तरा उरखर। मझही पतड़ा भितरे ओन्टा तेला मन्न एथरा। मइय्या मेन एरनर ख़ने लाले - लाल पंजका तेला एथरा। मन्न थेपड़ो रहचा अबंगे तंग दई मन नू अरगिया दरा अगम बग्गे पंज्जका तेलन खत्ताचा। छोटे बबुस होरमी पंज्जका तेलन ख़ोड़चस दरा ओन गुसन उय्यस। दुयोर उकियर दरा उछना गुटी मोक्खर। बिड़ना उल्ला रहचा आर गे अम्म ओनका लगिया। तंग दई तंगड़ीसिन मन्न गहि ढोढरो नू कपरताचा तले तान अम्म बेद्दा गे उरखा। बिड़ना उल्ला,होरमी तरा ख़ेख़ेल ख़ाइका, अम्म मल ख़ख़रा लगिया। ढेर गेच्छा नू अम्म ख़खरा। इदिगे एका बग्गे बेड़ा अम्म ओंदरनुम लगिया। आद अम्म ओंदरा की बरचा दरा तंग्हय सन्नी भाइसिन ढोढरो अबड़ा गे बेद्दा कुद्दिया पहें आ ख़द्दस मल ख़खरस। 

      आसीन ओरोत ख़खिया की ढेर बग्गा बन्दरर बरचर दरा पिटयर नो-चर-चोथ्थर की मोक्खर। आ सन्नी ख़द्दस बन्दरर संग्गे एका से लड़ा ओंगोस। तंगड़ीस मल ख़खरस ख़ने चींख़नुम -ओलख़नुम एड़पा तरा किररा हेल्लरा। डहरे नू अदि गहि भेंट ओंटा राजा बेटास गने मंज्जा। आ राजकुमारस अदि गहि चींख़ना गहि कारनन मेंज्जस। आद चींखनुम होरमी कत्थन तिग्गया चिच्चा। राजकुमारस अदिन तंग्हय एड़पा ले ओच्चस। कुकोय एरागे अगम बेस एथरा लगिया बअना गहि माने सुन्दराही रहचा। अदि संग्गे बेंजरस की अदिन रानी कमअर राजदरबार नू उय्यस। आद राजकुमारी मनर नगद दवले रआ हेल्लरा।

     ओन्टा जोगिस आ पतड़ा ता तेला मन्न डहरे नू बरआ लगियस। आस ईरीयस की ओंटा आल चपटा पतड़ानता ख़ोप्पा नू टंगरकी र'ई । आस अदिन ओच्चस दरा ओन्टा केन्दरा कमचस। ई केन्दरन अस्सर नेआ-ओना लगियस। उन्दुल आस राजदरबार नू भिक्छा नेआ केरस। दरा केन्दरन अस्सा हेल्लरस। अइय्या ती रागे उरखा हेल्लरा तिमखी तिडिंग तिमखी तिडिंग पानी आने गेले दीदी हुवांय रहले दीदी हुवांय रहले। अर्थ - दई नीन दु:खन सहनुम ख़ड़िदकन तिम खत्तरनुम चोअनुम अम्म ओंदरआ किरकी दरा अतरम रईह केरकी। सात सै बन्दरा दीदी चीर खलांय दीदी फाइर खलांय। तिमखी तिडिंग तिमखी तिडिंग पानी आने गेले दीदी हुवांय रहले। दीदी हुवांय रहले। अर्थ:- दई नीन दु:खन सहनुम ख़ड़िदकन तिम खत्तरनुम चोअनुम अम्म ओंदरआ किरकी दरा अतरम रईह केरकी। सय सुड्डी बन्दरर दई एग्गन पिटयर दरा नोईच्छ-चोईथ ननर मोक्खर। दई नीन अतरम रईह केरकी। 

     जोगिस गहि केन्दरन ता ई डंडीन मेंज्जा ख़ने तंग्हय सन्नी भाइय्योसिन याद नंज्जा दरा बिलखनुम-बिलखनुम चींख़ा हेल्लरा। इदि गहि चींखनन मेनर राजास मेंज्जस:- एन्देर गे चींख़दी, एन्देर मंज्जा का ? आद राजा सिन होरमी कत्थन ओर-सोर ती तिग्गिया चिच्चा। राजकुमारी जोगीसिन राजमहल भीतरे ओच्चा दरा आस गे आस गहि नेच्चका पैसान चिच्चा दरा केन्दरा खिंदया दरा उय्या।जोगिस पैसा होअर केरस ख़ने आद केन्दरन पटकाचा दरा ख़ोटिया चिच्चा। केन्दरा ख़ोटरा ख़ने तंग्हय सन्नी तंगड़िस झकमखरनुम अलखनुम उरखस। राजा-रानीर आसीन एरर अगम खुसमारर। तंग दई गहि रिझन तो बअना दिम मल्ला। गोट्टा बेल बख़ड़ी नू जतरा लगा हेल्लरा। 

     तंग दई-राजकुमारी तंगड़ीसिन हूँ तंग्हय राज महलनुम उय्या। ई लेक्खे दुयो भाई-बहिन गे राज सुख मंज्जा केरा। दु:आ नू भगवानस बेसहारारिन सहाड़ा नन्दस।