पेटू हुँडरा

     ओन्टा परता अरा टंगरा-टोंगरी गहि ढोढरो नू ओन्टा हुँडरा रआ लगिया। आद अकय खदहुड़ रहचा। एन्दरअम किंकोन एरा लगिया अदिनुम मोंख़ा लगिया। ओंगहोन कूल कीड़ा नू कुद्दा लगिया आबीरीम ओन्टा बकुला एथरा अदिन धरचा दरा मोख़ा चिच्चा। मुन्धभारे कालो बीरी ओन्टा एड़ा एथरा अदिन आद बाचा एन निग्गन मोख़ोन बअचा ख़ने एड़ा आनिया नीन एंग्गन मोख़ा ओंगोय? एन निंग्गन कुसोन दरा पिटोन चिओन। हुँड़रा बअचा एन चरक चन्दन बकुलन मोक्खन निंग्गन मोख़ा पोलोन बाचा दरा मूरखेम धरचा दरा पिटया मोख़ा।

      एँड़ता उल्ला आद तंग्हय ओंन्ना-मोख़ना गहि खोज नू पइरी-पइरी बीरिम उरखा। डहरे नू अदिगे ओन्टा भेंडो ख़खरा ख़ने हुँडरा बाचा एन निंग्गन मोख़ोन। आद आनाकिरताचा नीन एंग्गन मोख़ा पोल्लोय एन निंग्गन कूस्सा-कूस्सा पिटोन चिओन। ख़ने आद बाचा एन चरक चन्दन बकुलन मोक्खन,निंग्गन मोख़ा पोल्लोन,एन मे-में एड़न हूँ मोक्कन बाचा दरा मूरखेम धरचा की अदिन हूँ मोक्खा दरा डेम-डेम रा उड़चा केरा। ए-का हूँ पोल्ला हेल्लरा। 

     दोसरा उल्ला अदिगे मूरखेम कीड़ा लगिया। आद बेद्दा-मोख़ा गे पइरिम उरखा,डहरे नू अदिगे ओन्टा कडरू ख़खरा। अदिन ईद बाचा एन निग्गन मोख़ोन।ख़ने कड़रू बाचा एन निग्गन कूस्सा-कूस्सा पिटोन चिओन। आद तंग्हय जोरगरन एदानुम आनिया ए:न चरक चन्दन बगुलान मोक्कन। में-मे एडन मोक्कन। कुबुस-कुबुस भेडोन मोक्कन बाअचा दरा मूरख़ेम जोर नंज्जा दरा कड़रून हूँ पिटर चरिया-पालकिया दरा मोक्खा। मोख़नुम-मोख़नुम आद मोटारकी रहचा। कडरून हूँ मोख़र डेम-डेमरा केरा। मुन्धभारे काला हेल्लरा ख़ने अदिगे अम्म ओनका लगिया। डहरेनुम ओन्टा पोखारी एथरा।आद पोखारिन बअचा एन निंग्हय अम्न ओनोन, पोखारी अनिया नीन एग्हय अम्मन ओना ओंग्गोर ? ख़ने आद तंग्हय बहादुरिन तेंग्गा हेल्लरा। एन चरक चन्दन बकुलन मोक्खन। में-में एड़न मोक्कन। कुबुस-कुबुस भेंडोन मोक्कन। ओंय-ओंय कड़रून मोक्कन निंग्गन ओना पोल्लोन? बअचा दरा उमठरना गुटि ढिर-ढिर रआ अम्मन किइय्या एत्तार ओंड्डा। पुखारी गड्डी रहचा अरगा पोल्ला दरा केच्चा। आलर गे लूरगर मनर अवकत भइर एन्दरिम नलख नन्ना र'ई,अदिन ती मंइय्या मला।