अन्धरस अरा कुबड़स

      ओन्टा कुबड़स अरा ओरोत अन्धरस रहचस। अन्धरस ओन्टा हूँ एरा पोल्ला लगियस अरा कुबड़स एका पोल्ला लगियस। कुबड़स बाचस एंग्गन नीन घोड़ो नना होले एन डहरे एदओन। आस गहि बअनन अन्धरस हामी गच्छरस। दुयोर एनेम कुदार तेम्बा ओना लगियर। उन्दुल ईर तेम्बनुम राजदरबार नू अंड़सियर। गोलस गहि ओन्टा परिदका राजकुमारी रहचा अदि गहि मूंद (तीन) गोटंग दूदही रहचा। ढेर चान नू आद परिदया केरा। बेलस घोखचस एन्देर गे ईद एन्ने मंज्जा! आस पंडित गुठियारिन मेख़इय्यस दरा मेंजस। आर आनियर ईद दव मल्ली। इदिन पिटा चिआ। मल पिटोय होले नीन ख़ेओय कालोय। चोन्हान ती बेलस अदिन मल पिटियस। बेलस घोखआ लगियस नेकिम न नेकिम इदिन होओर। तिम्बुर राजदरबार नू तेम्बा कोरचर। बेलस आरिन इरय्यस दरा तंगदन कुबड़ा तिम्बुस गे चिच्चस। आर बेल ककोयन ओच्चर दरा काला हेल्लरर। ख़ड़दियर ख़ने आर ओंन्टा टोंड़ग नू बसा नंज्जर दरा मंडी बितआ हेल्लरर। कुबड़स अरा तंग्हय आली ओन्दगुसन गेच्छम उक्कर रहचर। अन्धरस तेभरका चूल्हनता चिच्चन उरूआ हेल्लरस,मोसगा आस गहि ख़न्न नू कोरचा ख़ने आस ख़न्नन निलबियस। निलबकन ती ख़न्नता जला ख़चरा केरा। आस एरा हेल्लरस । आ सुन्दराही कुकोयन अन्धरस ईरियस दरा बाचस ई कुकोयन ईनीम उय्योन। कुबड़ासिन पिटोन। अन्धरस कुबड़ासिन पिटागे लवआ कोड़ा हेल्लरस। कड़मा गुसन टेम्पा जोर से लग्गिया। आ कुबड़स गहि कड़मा सोझ मंज्जा केरा। आस एका - भोंग्गा हेल्लरस। 

      कुबड़ा सिन लवनन एरर बेल कुकोय चिचयारी है-रे कुबड़ा है-रे कुबड़ा बअर चिंख़नुम ओलख़नुम तंग्हय छातिन लवरा हेल्लरा। छातीन लवननती अदि गहि ओंटा दूधही छाती भीतरे कोरचा केरा। ई लेक्खआ आर होरमर कोड़े मंज्जर केरर। रिझे-रिझे आर बेल दरबार किररयर केरर दरा होरमी कत्थन आसीन तिंग्गियर। बेलस अगम खुसमारस। अन्धरस गे नन्ना कुकोयन बिद्दियस चिच्चस दरा तंग्हय दरबार नू उय्यस। आर दवले उज्जा-बिज्जा हेल्लरर। धरमेस दिम जनम-करम चिअदस अरा जोड़ी-पाँती ननताअदस ईद मानी कत्था दिम तली।