कुंड्डी ख़ो-जना

     कुँड़ुख़र कोहा बेंज्जा ही नन्ना उल्ला पइरी बीरी कुंड्डी ख़ो-जना ने-ग नन्नर। इदिन पद्दा कमना मलता पद्दा ओकतअना हूँ बअनर। इ नलखन नना गे मड़वा एड़पा ती इदातो एका एड़पा नू खेएनर आ एड़पा ती 100रु ढिबा होअनर। सन्नी रअनर होले 50 रु ढिबा। ओंटा छिपा, ओंटा किचरी, ओंद अउड़का तीख़िल ओंटा बउगी नू सजअर होअनर। अदिन तूरियस होअदस। पहें छिपन बीसनर चिअनर दरा बराबरी ढिबन तूरियस गे चिअनर अदहा तमा पंचर गे मनी। केच्चका एड़पा ती पंच्चर गे अउरहेम तीख़िल, इसुंग,बे-क,बालका-मसला,कंक चिअना मनी। इबड़ा ढिबा तिम ओंटा तम्बाही ख़े-र ख़ें-दनर । कुंड्डी ख़ो-जना अड्डा पद्दा नू ओन्द अड्डा टिपिचका र'ई। आ टिपिचका अड्डा नू नयगस आ ख़े-रन चराबअदस की टोंगए पसा ती कुक्कन लवअर पिटदस। आ ख़ों-ख़ा ख़े-र गही ठो-रन अरा ओरख़न खंड्डनर अन्तले ओरतस ख़े-र ख़ेड्डन धरअर ख़े-ख़ेल नू घिसयअनुम भोंगतआदस। ख़ों-ख़ा -ख़ों-ख़ा ओरतस बालकन अरा इसुगंन दुब्बा घांसी ती छिटकअनुम भोंग्गदस। एन्ने नन्नुम तंगआ पद्दा गहि सिंया गेच्छा कानर दरा असते फिर कुंड्डी ख़ो-जना अड्डा किररनर। असन बरअर ख़े-रन मो-चर कमअर तीख़िल संग्गे टहरी (सुड़ी) बीतनर। बिच्चका ख़ों-ख़ा टहरिन केच्चका एड़पा नू हूँ होअनर चिअनर दरा बच्छरकन होरमा पंचर असानुम ओन्नर मो-ख़नर। इदिनुम कुंड्डी ख़ो-जना बअनर।