गमी (अकलक बेड़ा)

कुँड़ुख़ ख़ोंड़हा ता एकअम आलर पच्चिका ती,नड़ी ती मलता एकअम मलदव अकलक ती खेएनर आरिन मांड़नर चिअनर मलता ओलदअनर हूँ चिअनर। आ ख़ोख़ा केच्चका आलर गहि नामे ती ओंतअना-मो-ख़तअना मनी आ बीरीम ओंटा ने-ग मनी अदिनुम गमी/काम किरया मलता उतुर खिलना हूँ बअनर। केच्चका ख़ों-ख़ा नीकइम गा अउलम नन्नर मलता नीकइम गा 10रो-ज,12 रो-ज,15 रो-ज मलता ओंद चन्दो ख़ों-ख़ा गमी नन्नर। कुँड़ुख़र गही ओड़ोगना र'ई का आलर खेएनर पहें जिया मल खि'ई अवंगे होरमा केच्चका आलर गहि हूँ ओंटा ख़ोंड़हा मनी अरा आरिन पचवालर बअनर। बअना ईदिम र'ई का केच्चका ख़ों-ख़ा पचवालर हूँ नम्हय लेखअम उज्जनर ओक्कनर। तो एवंदा उल्ला गूटि नेखअय दिम गमी/काम किरया मल ननोय अवंदा गूटी आरिन पचवालर मल संग्गे नन्नर। अवंगेम ई ने-ग अरगी नन्ना गूटि केच्चका एड़पा नू मंड्डी बि'ई होले हुरमी ती मुन्ध आर ही नामे ती ओंटा खे़-तानू मंड्डी ख़ोल्लनर तबहेम एड़पा ता आलर ओन्नर।

     गमी नना गे उल्ला टिपनर दरा होरमा हेद्दे-गेच्छाता तंगआ पाहियारिन नेंवता चिअनर। संग्गे-संग्गेम पद्दा ता आलारिन हूँ मे-ख़नर। अउला गे जोक्क झरा हूँ बाकनर। बहरी ता पाहियर हूँ झरा ओन्दरआ की बरनर। बेंज्जा नेंवता लेखअम तीख़िल-दाली,अमख़ी गुट्ठी ओन्दोरआ की नेवता बरनर। हाँ झरा अड़िन अतख़ा ती मल मुसगर (अड़ी मुखन पत्तंगली ती डबअर हेअनर) बुसऊन मुखा नू ठुसअर होअनर। इदिन ए-रर किम आलर अख़नर का गमी नेवता काला लगनर। होरमर जुमुरका ख़ोंख़ा नयगस खेवन गड्डी चाली नू दूरा-बली(दरवाजा)मुन्धवारे अरख़दस। अदहा आलर ख़ेस्सन लवा इड़नर,मासिन,मनिन,बगुरन (कबसी गोटा)ओंटा नखल नू इड़नर। लोहरा एड़पा ता गेरन ओन्दोरनर। अबड़ा हुरमी बिरहिन मेसअर पंचे ख़े-ता नू खेवन गड्डी हेद्दे उइनर। इदिन ती मुन्ध पद्दान्ता मुक्कर ख़े-ता नू तीख़िल होअर कानर अदिन खेवन तीख़िल बअनर।

     खेवन गड्डी अरिख़का ख़ोंख़ा नयगस उतुर टिड़आ गे मे-ख़दस‌। हुरमी ती मुन्ध एड़पा ता आलर उतुर टिड़नर आ ख़ोख़ा पद्दान्ता आलर अरा पाही बरचका आलर। इसन ओंटा गोतर आलर ओंटा ख़े-ता ता बिरहिन होअर डेब्बा ख़ेक्खा ती खेवन गड्डिन डेब्बा किरंदआ-किरंदआ अइय्या सजनर। सजओ बीरी बअनर-ओन्दा फलना/फलनी इन्ना निंग्गा पान डुबहा पान छिड्डा चिआ लगदम। इन्ना निंग्गा किरया चिआ लगदम। एन्ने बाच-बाच मूंद धवं खेवन गड्डी नू सजनर। इत्तरा पुजरस बालकन अरा इसुंगन आर मंइय्या दुब्बा घांसी ती छिटकअदस।एन्ने नलख मंज्जका ख़ों-ख़ा नयगस ओंटा तम्बाही ख़े-रन खेवन गड्डी गुसन चराबअदस की अदि गहि कुक्कन ऊसंगी ती लवअर पिटदस। ख़ें-र गहि ख़ें-सन,ओरख़न अरा ठो-रन खंड्डर आ खेवन गड्डी नू सजदस।

      खेवन ती चो-चका ख़ों-ख़ा मुक्कर मसड़ा कानर। ओंटा जितिया डाड़ा गहि मूंद अतख़न ओंद संग्गेम उलटी तरती ओज्जर कोंचो लेखआ कमनर। ओंटा बज्जा गहि आल कमनर अदिन आ कमचका जितिया अतख़ा गहि कोंचो नू सजनर। जोक्क बिदगी बीतनर। आबदा मे-र दरा कफन किचरी होआ की मसड़ा कानर। संग्गेम ओंद बोतोल अरखी हूँ होअनर। मसड़ा अंड़सर मुन्ध मसड़ा नू मून्द बे-ड़हा आबदा मे-रन डेब्बा पोज्जनर। एन्ने ननो बीरी ख़ेड्डन अड़झअर की ए-कनर अन्तले मसड़ा कुक्क तरा खे़ड्डन अड़झअर की ए-कनर अन्तले मसड़ा कुक्क तरा खे़ड्डन अड़झअर की ओक्कनर दरा आ बिदगिन मसड़ा नू नूलगअनर। इबड़ा ने-ग मंज्जका ख़ों-ख़ा कफन चिअर असते चोक्ख मन्नर। जोक्क हीड़ी बरअर अरखिन गठड़ा अतख़ा नू चूरख़अनर अन्तले ताम हूँ ओन्नर। ओंड्डका ख़ें-तन अन्नेम मल रआ चिअनर अदिन चर्रनर चिअनर।  

     मुक्कर गहि मसड़ा ती किररका ख़ोंख़ा उसता दान मनी। मजही चाली नू ओरतस ओक्कदस। आस गुसन कालर आ केच्चका आलस गही नामे ती जे ढिबा चिअनर। होले उक्का आलस बअदस का मेना हरो पंच्चर फलना पद्दा ता फलनस, फलनस/फलनी गहि नामे ती इवंदा ढ़िबा उसता दान चिच्चस। एन्नेम ने एका से उंग्गी अन्नेम ढिबा चिअनर। अबड़ा ढिबा गही अरखी ओन्नर। अवंदा बेड़ा गे आ खेवन तीख़िल अरा चलाबाचका ख़े-र गही सुड़ी (टहरी)बि'ई काली। बिच्चका ख़ों-ख़ा हुरमी ती मुन्ध तूरियस गे मून्द पतंगली ख़ोल्लर की चिअनर। अदिन आस पचवालर गे टिड़दस अन्तले होरमर ओन्नर मो-ख़नर।