तुरता पचगिस अरा बंडा चिगलो

     ओन्टा पद्दा नू ओन्टा पच्चो अरा पचगिस रआ लगियर। आर गहि ख़ल्ले - उखड़ी रहचा। संग्गे-संग्गे आर भेडो,एड़ा अरा ख़ेर पोसआ लगियर। इबड़ानतिम आर गहि उज्जना-ओक्कना चलरआ लगिया। पद्दानती बाहरी-कूटिनता टोंका नू आस जिनहोर इदिचकस रहचस। जिनहोर लहलहरकी परदकी रहचा। एका बीरी ईद ख़ज्जा दरा पाना हेल्लरा आबीरी ओन्टा बंडा चिगलो मांख़ा बीरी बरअर दरा मोख़ा लगिया। पचगिस तंग्हय जिनहोरन बछाबाआ गे पुतबीरी ख़ापा हेल्लरस जोंहकारी नन्ना ओर नंज्जस नितकीनता लेक्खेम ई बन्डा चिगलो खोड़ती बीरी बरअर जिनहोरन मोख़ा हेल्लरा। पचगिस कुदाबाचस अरा ओंद ढेलमुगरा लवचस हूँ। ख़ने चिगलो पचगीसिन घिराबाचा रहा तो पचगी निंग्हय ख़ेर एकसन कालो एन निंग्हय ख़ेरन मोख़ोन चिओन।

      बंडा चिगलो गहि धिराबअनन मेंज्जस की ओन्टा तांतरन धरअर मांख़ा बीरी चुपेम ख़ेर गहि मझही नू उक्कस रहचस एकासे चिगलो बरचा दरा ख़ेरन धरआ बिद्दिया आबीरिम तुरता पचगिस तांतर तुरू अदि गहि कुक्कन एक बेर धरआ बिद्दिया आबीरिम ख़ेर लेक्खआ जोर-जोर से ठोठचस। तब आद बआ हेल्लरा ई तुरता पचगिस गुसन अगम कोहा-कोहा ख़ेर र'ई ।  ईरिन एन पोल्लोन।

      पतड़ा तरा किरो बीरी आद बआ हेल्लरा रहा तो पचगी निंग्हय भेंडो एकसन कालो-आरीन एन पिटोन दरा मोख़ोन चिओन। अदिगहि धिराव-तकावन मेंज्जस की मांख़ा बीरी ओन्टा कुटैसिन धरचस दरा भेड़ों गहि मझही नू चुपेम ओक्कियस केरस। माख़ा बीरी बंडा चिगलो बरचा दरा भेड़ोन धरआ बिद्दिया। जय बेर धरआ बिद्दियस तय बेरिम पचगिस चिगलो गहि कुक्कन कुटैसिन जोर से भेंडो गहि कुसना लेक्खअम बजड़ाचस।एन्ने नंजकनती आ बन्डा चिगलो पचगिस गहि भेंडोन धरअर भोंगतआ पोल्ला। हइर-गुइन ईद आस गहि पछडाअनन अम्बिया चिच्चा। पच्चो-पचगिर नगद ले नना-ओना हेल्लरर। पचगिस लेक्खअम लूरगर मन्ना होरमा आलर रिन चाड़ र'ई।