जों-ख़ेड़पा/धुमकुड़िया
जों-ख़ एड़पा बआ ख़नेम पता लग्गी का जों-ख़र घी एड़पा। कुँड़ुख़ खोंड़हा नू ओन्द किसिम घी अकय नेमहा एड़पा रई। एका अइय्या का कुँड़ुख़ जों-ख़ारिन लूर सिखाबअनर। कुँड़ुख़र एका बीरी ती ख़ोंड़हा नू रअर उज्जा-बिज्जा सिक्खरर अरा पद्दा कमअर रआ हेल्लरर आ बीरीतिम तमा गे रिज्झ ढंग नना गे पद्दा मजही नू ओंटा अखड़ा कमचर। आ अखड़ा हेद्देम जों-ख़ एड़पा हूँ कमचर। आ जों-ख़ एड़पा नू परिदका जों-ख़ारिन बेंजेरना ती मुन्ध जों-ख़ एड़पा मंक्खर ख़ोंडहा नू एका से उज्जना ओक्कना मनी अदिन सिखाबअनर। जों-ख़ मंक्खना गही ओंटा अइन र'ई। पद्दा नू एका-एका से जों-ख़र परिदका कानर अन्नेम ओंटा जोड़ा जों-ख़ारिन नेखय का 11-12बछर मनी आरिन ए-रर गननर का इदना जों-ख़ एड़पा कुरऊ मदहेर एवंदा झना रअनर। अन्तले कोंहा बेंज्जा ती मुन्ध एकअम उल्ला मुन्ध ता जों-ख़ एड़पा कोरोचका कोंहा जों-ख़र ख़ाड़ तरा इंज्जो पिटा कानर। पिसा बरअर की पिटका इंज्जोन चाजनर की पुठी इंज्जोन ओंद चोक्ख नन्नर। अबड़ा पुठी इंज्जोन अतख़ा नू टिपअर एका एड़पा नू जों-ख़ एड़पा कोरना जोगे कुक्कोर रअनर आ एड़पा नू चिआ कानर दरा बअनर का ओन्दा ए-म इंज्जो चिआ लगदम। इन्नातिम फलनासिन जों-ख़ एड़पा मंक्खा लगदम। अन्तले आ पइरीतिम इंज्जो ख़ट्टिका एड़पा ता जों-खर गही जों-ख़ एड़पा कोरना मनी काली दरा जों-ख़ एड़पा ता हुरमी अइन नलखन नना गे भार गच्छरनर। पुठी इंज्जोन चिअना गही ख़ों-ख़ा ईदिम घो-ख र'ई का इबड़ा जों-ख़र कुड़ही मल मनोर, हुरमी नलखन चाँड़े अंगियओर। ई पुठी इंज्जो लेखअम फर-फर ले बोगोंर-नखेरओर दरा फरहर मनोर। जों-ख़ एड़पा कोरोचका ख़ों-ख़ा मून्द बच्छर गूटी रअना मनी। मून्द बच्छर नू जों-ख़ एड़पा मंक्खनर। ओंद परिया नू एंड़ तूड़ ता जों-ख़र जों-ख़ एड़पा नू रअनर। कोंहा तूड़ अरा सन्नी तूड़ कोंहा तूड़ ता जों-ख़र सन्नी तूड़ ता जों-ख़रिन नलख सिखा बअनर अरा तिहा नन्नर का सन्नी जों-ख़र नलखन दव ती अंगियाआ लगनर का मला। एकअम जों-ख़र कत्थन मल मेंज्जर होले आ तूड़ ता होरमा जों-ख़र गे डंड्डे ख़क्खेर'ई । एन्ने ती ने हूँ कुड़ही मला मना लगियर।
जों-ख़ एड़पा नू पुत्तिया होले बिल्ली दगना, पुंइय्या उल्ला नू पसंगी लगाबअना। अबड़ा अड्डा एररना-ओत्थोरना । पिटरी गुट्ठिन दव कट्टना। जों-ख़ एड़पा नू पचगी मदहे आलर हूँ बेडरा काला लगियर आरिन सेवा सुसरा नन्ना धरम नलख रहचा। ओंड्डका-मोक्का ख़ों-ख़ा ख़ुड़ती बीरी ख़े-ल-डमुवा ओत्थोरअर बे-चागे ओ-र नन्ना।
जों-ख़ एड़पा इवन्दा नेम्हा अड्डा तली का अइय्या कुकोय ख़द्दर, पेल्लर, मुक्कर गे कोरना खरा कोड़हे बरजाचका र'ई । अगर एकअम कुकोयर भोड़ (भूल) ती कोरचर होले आर गहि खे़बदा ती खें-स ओत्थोरआ लगियर। बआ लगियर का इन्ना ती कुरचकी तो निंग्हय ख़ेबदा नुम खन्नडोर। इवंदा हूँ का सन्नी कुक्को ख़द्दारिन हूँ कोरआ मल चिआ लगियर।एन्देर गे का जों-ख़ एड़पा नू हुरमी लेखआ कत्थन कच्छनखरआ लगियर। कुँड़ख़र हुल्लो परिया तिम इवन्दा अख़आ लगियर का एका कत्थन एका अड्डा नू कच्छनखरना चहि।
जों-ख़ एड़पा मजही खूरी नू अखड़ा हेद्देम मनी। ई एड़पा अकय कोंहा मनी पहें अइय्या ओंटा एकला दूरा र'ई आद हूँ तवं मेच्छा मल,रअर आलर ती पुड्डम मनी एन्देर गे का कुँड़ख़र ओड़गनर का एड़पा ओंटा देव अड्डा तली। अवंगे एड़पा कोरओ बीरी कुक्कन जोक्क लेंवख़अर कोरनर। इदिगहि मने का एड़पन मोंजरा मन्नुम कोरना। ई मला का उजगो तरनारअर कोरआ। ई एड़पा नू जंगला गुट्ठी मल र'ई। एन्देर गे का एन्ने एड़पा नू अंवखना उल्ला नू हूँ मल अवंखी। अरा पंइय्या उल्ला नू उम्हे लग्गी। ई लेखआ कुँड़ख़र एवंदा लूरगर रहचा मुन्ध तिम।
जों-खे़ड़पा कुँड़ख़र ही तंगआ लूरकुडिया तली इदिन हिन्दी नू युवा गृह बअनर। जों-ख़ेड़पा ही चलउ हुल्लो परियातिम बरआ लगी। इय्यातिम चेंड़ा जों-ख़ारिन लूर सिखाबअनर। कुँड़ख़र गहि ई रीतन ए-रर नन्ना खोंड़हा इदा तो मुड़ा,संथाल अरा अउरहो जइतर हूँ तंगआ खोंड़हा नू ई लेखआ रीतन अंगियाचर पहें जों-ख़ेड़पा गा कुँड़ुख़ खोंड़हा नू हुल्लो परियातिम र'ई । इय्यम रअर की कुँड़ुख़ ख़ोंड़हा ता ख़द्दर हुरमी किसिम ही लूरन सिख़िरआर उरूखनर की ख़ोंड़हा ही पांती नू एका नगद ओक्कनर इजनर। एन्देर गे का इय्यम रअर तंगआ ख़ोंड़हा ता रीत-भांत, ख़ोंड़हा नू ओक्कना-इजना,चाल-चलन, ने-ग-जो-ग अरा धरम पत्त नू लूर ख़क्खनर। ई जों-ख़ेड़पानुम रिज्झ-ढंग नन्ना ही आलोन इदा तो ख़े-ल,डमुवा,झण्डा,झांझ,भें-रे,नरसिंघा, घोड़ों-हँथी, अरा रम्पा-चलपा गुट्ठिन उइनर। इबड़ा नलखन ए-रा गे कोटवार उइनर। ई कोटवारेस होमारिन तिहा नन्दस का बे-चो बीरी नीकइम दव बे-चा लगनर का मला। ईस ने-कआनुम डंड्डे हूँ चिआ ओंग्गदस। जों-ख़ एड़पा ता नलख दव ती मनो इदी खतरी जों-ख़र बेड़ा कोरजों इसुंग होअनर। इत्तु जों-ख़ेड़पा नू बिल्ली दगनर। एन्नेम जुदम पेल्लर गे पेल्लो एड़पा मनी। अइय्या ता नलखन ए-रा गे पेल्लो कोटवार मन्नर। पेल्लो एड़पा अरा जों-ख़ एड़पा गहि तंगआ नेम्हा हुदा अरा महबा र'ई अइय्या एकअम किसिम गहि मलदव कत्था मल मनागेम एंड़ो एड़पा जुदा अरा गेच्छा-गेच्छम मनी। ई कत्थन गा ई डंड्डी ती अख़आ ओंग्गनर : -
बे-चा नलर संग्गे एड़पा बरके
बे-चा नलर जुड़ी एड़पा बरके,
खूरी कुद्दा अम्के काला हो
खूरी कुद्दा अम्के काला।।
खूरी-खूरी कालके हुरमी खूरी कालके
खूरी-खूरी कालके हुरमी खूरी कालके
पेल्लो खूरी अम्के काला हो
पेल्लो खूरी अम्के काला।।
पेल्लो खूरी कला ख़ने ख़ेड्ड मला थम्बरओ
पेल्लो खूरी कला ख़ने गुंड़ख़ी मला थम्बरओ,
पेल्लो खूरी अम्के काला हो
पेल्लो खूरी अम्के काला।।
जइ-बेजइ मनो संग्गे अयो - बबर केबोर,
जइ-बेजइ मनो जुड़ी अयो-बबर केबोर,
आ बीरी ने जिया चिओर हो
आ बेड़ा ने कया चिओर।।
पहें अक्कु इबड़ा हुरमी बहरी आलर गहि बरना अरा सरकारी नलख गहि चड्डे उल्ला - उल्ला मेटेरनुम काला लगी।
Comments
Post a Comment