मुक्का सेन्दरा

     हुल्लो परिया नू एका बीरी नम्हय पुरखर रुइदास गढ़े नू रहचर आ बीरी मानी मुक्का सेन्दरा ओ-र मंज्जा नम्हय अयंग अरा बहिन गुट्ठियर तुड़कारिन सेन्दरा बीचयर। एका बेड़ा नू सेरसह बे-लस बिहार राजी नू बरचस। अदिन्ती कइनो खुटी मुन्ध नम्हय पुरखर रुइदास गढ़ेन कमचर अरा खरा सलसन्त रआ लगियर रदा हंकदारआ कुद्दा लगियर। आ बेड़ा नू ईर इवंदा जोड़गर रहचा का आरिन ने हूँ हराबआ पोल्ला लगियर। पहें होरमा अख़नर का तुड़कर अकय जिदहा अरा जोदहा आलर तलिनर। आर हूँ कय खेवां कुँड़ुख़ारिन हराबअना गहि चिहुँट ननर गढ़ेन बच्चा बिद्दियर। पहें पोल्ला लगियर पद्दा नू ओरोत महरा मुक्का नितकिम दुदही - मही बीसा गे गढ़े उला काला बरआ लगिया।अदि गहि नामे लुन्दरी रहचा। अदिन आर ए-रर छेकचर अरा आनियर "अनय आली! नीन नितकिम कुँड़ुख़र ही गढ़े नू दुदही बीसा कादी नीन तेंग्गय तो ए-म एका बेड़ा नू आर मंइय्या टुटुरओम होले आरिन हराबआ ओंग्गोम ? आद बाचा अगर नीम सहजेम आर मइय्या टुटुरओर होले गा एरख़ेर-एरख़ेर बरओर अन्नु हूँ कुँड़ख़ारिन हराबआ पोल्लोर। हाँ अगर नीम आर गहि बिसु सेन्दरा उरुखका बेड़ा नू आर मइय्या टुटुरओर होले मानिम सेब्बम जितआ ओंग्गोर एन्देरगे का आ बेड़ा नू कुँड़ुख़ ख़ोंड़हा ता होरमा मे-तर टोंड़ग तरा ओन्द पे-ठ गे बिसु सेन्दरा बे-चा कानर। नीदि मुक्कर एकला रअनर। इबड़ा कत्थन मेंज्जर की आर अकय खुसमारर।

     बिसु सेन्दरा काना बेड़ा अंड़सिया होरमा मे-तर टोड़ग केरर बे-चा । तुड़कर ई बेड़ा इकला बरओ अदिन गा असरा ए-रम लगियर। कुक्क चप्पना बेड़ा ती जोक्क टघरारा की आचकम अकय गेच्छम ढेनेक-ढेनेक-ढेनेक ख़रख़ना अरा अल्ला हो अकबर बअना मेन्दरा। इदिन मेनर की अयंग अरा बहिन गुट्ठियर अक्खर केरर एन्देर गे का इदिन्ती मुन्ध हूँ कइक खेवां तुड़कर एन्नेम अस्सर अरा चिचयारनुम गढ़ेन बच्चा अरिगकर रहचर। आर जोक्क हूँ दिरी मल नंज्जर। सट्ठ-पट्ठ धुती चोअर कुक्क नू पगा हेअर चुंज्जना मन्नन चेड़अर की तकतकरआ उखर अरा आर गहि डहरे नू इज्जर केरर। तुड़कर गहि ख़न्न ठउकम आर गहि घनघनरआ इज्जका मन्न मंइय्या केरा। आर गहि पगा हे-चकन ए-रर की तुड़कर ख़रा इलिचियर केरर। जिया हूँ पूरओ तम्हय कुक्कन? इबड़ा मुक्कर आर ती हूँ बीसी सवंग ती अवंदा कोंहा-कोंहा मन्नन (समठन) किरतआ-बिड़िदआ हेलरर। तुड़कर इदिन ए-रर की खतेर-चोआ पछलिम भोंग्गा हेलरर। इबड़ा कुँड़ुख मुक्कर आरिन को-ड़नुम लवनुम खेदआ हेलरर। खेदनुतिम ख़ाड़ कड़तआ ख़च्चियर । आ बिसाही महरा मुक्का जिया नू घोखचा का अबरी गा तुड़कर कुँड़ुख़ारिन एन्देर हाल नंज्जर हंअन अदिन ए-रा गे गढ़े तरा बरआ लगिया। सुपट डहरे नू तुड़कर गने भेट मंज्जा। अदिन ए-रा गे गढ़े तरा बरआ लगिया। सुपट डहरे नू तुड़कर गने भेट मंज्जा। आर अदिन खरा खिसारकर रहचर। अदिन ए-रा ख़नेम भंड्डी बिसर केबा हेलरर। एन्ने ती आद इलचिया केरा दरा बाचा "बग्गारो! नीम ठकेरकर नीम जे बआ लगदर का असन मे-तर कोंहा-कोंहा मन्नन धरअर रहचर। आर मे-तर मला मुक्कर रहचर। नीम चांड़े - चांडे किर्रा दरा कला अरा ख़ाड़ ओट्टा नू इजअर ए-रा तो आर एंड़ो ख़ेक्खा ती मुँही मूझुरअर लगदन। मे-तर एन्ने मल मूझुरनर। तुड़कर किर्रर ए-रनर तो मानिम ईर मुक्कर तलिनर। इदिन अख़अर तुड़कर ख़ों-ख़ा बछर सपड़ारअर अउरहेम गढ़ेन बच्चा गे अरगनर दरा गढ़ेन दखल हूँ नन्नर। एन्नेम कय खेवां तुड़कर गने कुँड़ुख़ मुक्कर लड़ई नंज्जर। इदिन इयाद नना गेम हर बारह बछर नू मुक्का सेन्दरा मनी। अवंगेम डंड्डी हूँ पाड़नर : -

       बारा बछारे बइनी साकार,

       बइनी का मुड़े राजा पगारी बांधय।

       हाथे तलवार गोड़े घुघुर, 

       बइनी का मुड़े राजा पगारी बाँधय।

     अक्कुन हर बारह बछर नू मुक्का सेन्दरा मनी। इय्या मुक्कर -मेतर गहि मुठन धरनर। ने गा धुती -चोओर ने गा इन्नेला ता फतलूगन अत्तोर कुक्क नू कोंहा-कोंहा पगा ननर बल्लू,सोट्टा का तड़रिन धरअर नन्ना पद्दा कानर। नन्ना पद्दा कालर अखड़ा नू पाड़ा-बे-चा हेलेरनर। होरमा मुक्कर मरदनर लेखअम कछनरखनर। मुक्का सेन्दरा बरचकन अख़अर आ पद्दा ता आलर जुमुरनर दरा आर गे ख़े-र,किस्स मलता ए-ड़ा गुट्ठिन ए-दनर । आ ख़ों-ख़ा ए-दका ख़े-र-किस्सन आर सेन्दरा बे-चर तंगआ पद्दा किर्रनर कानर। पद्दा किर्रर अबड़ा ओन्दोरका ख़े-र किस्सन मो-चर कमअर होरमा चोन्हा संग्गे दव ती ओन्नर -मो-ख़नर । अवंगेम डंड्डी र'ई : - 

       हुदी कोय भवंरो पेल्लो

       बली कोंड़ा नू बल्लू र'ई।

             मुक्का सेन्दरा कादी होले

             बली कोंड़ा नू बल्लू र'ई।