बिसु सेन्दरा

     कुँड़ुख़ खोंड़हा नू बिसु सेन्दरा गहि अकय महबा र'ई। ई सेन्दरा फग्गु सेन्दरा ती ख़ों-ख़ा मनी। बिसु सेन्दरा गहि मूली बेड़ा चइत अरा बइसाख चन्दो तली। ई चइत चन्दो दिम कुँड़ुख़ ख़ोंड़हा गे चान गहि ओ-रे चन्दो तली। ई चन्दो नुम बिसु सेन्दरा ओ-र मनी। बिसु सेन्दरा नुम पड़हा ता अइन-कन्दुन इसिरई अरा बनई। ई अड्डा नुम कुँड़ुख़ ख़ोंड़हा नू उज्जा -ओक्का ख़तरी हुरमी किसिम इदातो सामाजिक, राजनीतिक, आर्थिक, धार्मिक अरा सांस्कृतिक पत्त नू कोड़हे गड्डी गूटि घोखनर बिचार नन्नर दरा फरियारका अइन कन्दुनन पड़हा नू उइनर ‌‌अदिन होरमर गे पइत्तअना मनी दरा अइय्यम ए-कना मनी अक्कुन एकासे संसद नू सत्र चलरई आ महबा दिम तली बिसु सेन्दरा। इसन कोंहा ती कोंहा झनझट हूँ फरियारई काली। एका उल्ला बिसु सेन्दरा काना र'ई अदिन पड़हा बे-लर तंगआ-तंगआ पड़हा नू पंच ओक्कर राय रोजोट ननर उल्ला टिपनर। उल्ला टिपिरका ख़ों-ख़ा पड़हा बे-लस तंगआ पड़हा कोटवारसिन डहुड़ा कुत्तआ गे आनदस। होले कोटवारेर पद्दा-पद्दा तम्हय पड़हा नू डहुड़ा कुत्तआनर का फलना उल्ला बिसु सेन्दरा उरखोत अरा फलना अड्डा नू होरमा भइयोत जुमा मनोत की फलना परता कों-ड़ा नू कालोत दरा असन डेरा ननोत। बे-लर गहि ई डहुड़ा लेखअम हुरमी पद्दन्ता जों-ख़र जों-ख़ एड़पा नू जुमुरअर राय-रोजोट नना हेलेरनर का एका से काना मनो एन्दरा-एन्दरा होअना मनो। अगुवा चाजरका जों-ख़स डमुवन ठोकदस अन्तले झंड्डा धरउस ओन्टा झंड्डन ओत्थोरदस दरा होरमर सेन्दरा काला गे सपड़ारनर। हुरमी पद्दान्ता जों-ख़र , पचगिर तीख़िल- दाली ओदिम पे-ठ गहि जुमा नन्नर अरा हुरमी चाँड़ लेखआ आलोन जुमा ननर ओन्द अड्डा जुमुरनर। जुमुरका ख़ों-ख़ा ओन्द संग्गेम सेन्दरा काला गे उरूख़नर।

     पद्दा नू नीदि मुक्कर एकला बछरनर। इबड़ा मुक्कर गहि ख़ेक्खा नुम पद्दन ख़ापना गहि जिमा र'ई । इबड़ा मुक्कर भइर उल्ला तंगआ ख़ल्ल-टोंक्का नू नलख नन्नर। बीड़ी पुत्तका ती कट्टू-तवा नना गे एड़पा किर्रनर। ख़ुड़ती ओन्डडका ख़ों-ख़ा पद्दन सोहान नना गे का पद्दन ख़ापा गे मे-तर गहि धुतिन चोअर कुक्क नू पगा हेअर ख़ेक्खा नू सोट्टा मलता बल्लू धरअर खूरी-खूरी खूबिम धमइर कोचड़ारनर। होरमर तंगआ-तंगआ मे-तर गहि नामेन पिजिंरनर दरा मे-त भखम कछनखेरनर। मला होले अखड़ा नू मुसुरकुट पाड़ोर-बे-चोर । एन्ने ती एकअम दोकहर गे हूँ आ पद्दा नू कोरना गहि बाह मल मनी।

     अत्तरा सेन्दरा कालू मे-तर ख़ोंड़ोरना अड्डा नू (टिपिचका अड्डा नू) ख़ों-ड़ोरअर की गनती नन्नर। आर हुरमी पद्दान्ता झंड्डन ए-रनर का हुरमी पद्दा ती बरचर का मला। एकअम पद्दा ती मल केरर होले सिपाही तइय्या की आरिन एड़तअनर। अगर अन्नु हूँ मल बरचर होले आरिन डंड्डे चिअनर। डंड्डे हूँ जोक्क ओत्थम मनी इदा तो संवसे पड़हा ता आलारिन ओनतअना-मो-ख़तअना मनी। बिसु सेन्दरा डेरा अड्डा कानर की तंगआ-तंगआ पद्दियर जुदा-जुदा चुलहा कमनर। भइर उल्ला गा टोंड़ग-परता नू सेन्दरा बे-चनर । सेन्दरा बे-चो बीरी नन्ना पद्दियर गहि चो-दका माक नन्ना पद्दियर तरा काली दरा खतेरई होले खूबिम लग्गा नखेरना हूँ मनी। अवंगेम डंड्डी हूँ पाड़नर :-

       राजी सेन्दरा अम्बा कला भइया रे

       राजी सेन्दरा अम्बा कला भइया रे

            सेन्दरा नू लड़ई झगड़ा मनी हो

            सेन्दरा नू कलहा लग्गना मनी।  

     पुत्तका ती होरमर तंगआ-तंगआ अल्ला,चिंयारी धुनुसन संभड़अर की बसा अड्डा किर्रनर अरा भईर उल्ला ता लग्गा नखेरकन ओक्का नेवई नन्नर। सेन्दरा बी-चका किंको गहि पोट्टन ओत्थोरअर इड़यर मो-ख़नर दरा अहड़न ख़यदअनर। सेन्दरा बे-चना उल्ला पूर'ई होले एड़पा किर्रनर। एड़पा किर्रना उल्ला पद्दा ता होरमा मुक्कर अम्म होअर आरिन परिछआ कानर। आरिन ख़ेड्ड नो-ड़नर दरा असन मरजईद ती ओन्तअनर मो-ख़तअनर । सेन्दरा ती ओन्दोरका अहड़न एड़पा-एड़पा ख़ट्टर। ओन्टा एड़पन हूँ तीना मल ख़ाँडनर । होरमर गेम बराबरी बखरा मनी ।