नामे पिंज्जना (नामकरण दिन)

           ख़े-ख़ेल नू आलर गहि सिरजन -बिरजन मंज्जका ख़ोखंम एकअम लेखआ आलोन अख़आ गे अदि गहि नामे पिंज्जना आलर गे अकय चाँड़ मंज्जा। एन्देर गे का एकअम अड्डा का एकअम लेख़आ आलो,इदा तो-मन्न-मास ,जिया -जउँत गहि मलता आलर गहि दिम नामे बेगर पिंज्जम एकासे पोलनर।मने ईदिम मंज्जाका नामे बेगर पिंज्जम नेखअय दिम मलता एकअम आलो पत्त नू सुपट -सुपट कत्था मना फुल्ली। अवंगेम आलर ख़े-ख़ेल ता हुरमी आलो गहि नामे तंगआ -तंगआ भाखा ती सुबिसता लेखअम नामे पिंज्जयर दरा पिज्जनर।चहे आद धरमे चिच्चका आलो तली मलता आलर गहि कमचका तली। इबड़ा हुरमी गहि नामे आलर तंगआ -तंगआ भाखा तिम पिंज्जनर दरा अबड़ा आलोन अख़नर।पहे जोक्क आलो अक्कुन एन्ने रई का अदिन ने कमई आरिम नामे पिंज्जनर दरा गोट्टा ख़े-ख़ेल ता आलर अदिन आ नामेतिम अख़नर इदा तो अदि गहि तंगआ भखा ती जुदा नामे मल पिंज्जनर। एन्नेम एकअम आल,पद्दा,अड्डा अरा ख़ाड़ गुट्ठी गहि नामे हूँ ओंगहन इकला भखा पिंजिर-ई आ नामे तिम गोट्टा ख़े-ख़ेल ता आलर अख़नर,चहे आर एकअम भखा ख़ोड़हा ता एन्देर गे मल रओर इबड़ा गहि उलथा मल मनी।एकासे का-राँची,गंग्गा,हिमालय,सइकल,मोटोर, एन्नेम पह ओन्टा -ओन्टा (खटवर)आलर बडियअम पद्दा गुट्ठी गहि नामेन उलथा ननर बेगेड़आ लगनर। 

            एकअम आलो का अड्डा गुट्ठी गहि नामे एकअम बीरी ता मंज्जका अकलक मलता अदि गहि लछन ति धरनर। एकअम-एकअम जिया -जउँत गहि नामे अदि गहि चींख़ना रागे ती पिंज्जनर।एका से का :- कोकरो-चों बी ख़ने अदिन "कोकरों" चियम -चियम बई ख़ने अदिन "चियम" ढिच्चू-चू-ढिच्चू-चू बई ख़ने गा ढिचुवा,ख़ा----ख़ा बई अदिन ख़ाख़ा बाचर। पहें आलर गहि नामे पिंज्जना नलख कुँडु़ख ख़ोड़हा नू ख़रा नेम्हा रीत ति मनी। ए गूटी ख़द्दर गहि नामे मल पिंजिरई आ गूटी आल गन नू मल बरनर।अवंगेम अरगी पिंजिरनुम एकअम ख़द्दर एकअम लेखआ खेएनर होले आरिन जुदम ख़द्द मसड़ा नू मांड़नर।इवंदम मला बो-लो ख़द्द गहि नामे पिजिरका ख़ोख़म कड़मा नू करधानी अत्तअनर। इदि गहि मने मंज्जा का नामे पिंज्जका ती मुन्ध कया नू झुला-पेन्ठ मल अत्तनर। हुरमी खोंड़हा ता आलर तंगआ-तंगआ रीत भाँव ती ख़द्दर गहि नामे पिंज्जनर। पह कुँड़ुंख ख़ोड़हा ता नामे पिंज्जना ने-त -ने-ग इवंदा दव अरा महबागर रई का एकअम नन्ना ख़ोड़हा नू इदि जोक्खा एकसन हूं मल इथिर'ई । अवंगेम बरा कुँड़ुख़ ख़ोड़हा ता नामे पिंज्जना गहि नेम्हा रीतन ए-रोत,अख़ओत।

            कुँडु़ख़ एड़पा नू ख़द्दर कुन्दरनर होले हुरमी ती मुन्ध गा एड़पा ता मुध आलस ओन्टा ख़े-ता नू जोक्क आबदा तीख़िल सवा रू•ढिबा (मुन्द नू गा ओन्टा ढिबा चिआ लगियर) ओन्टा ख़े-र बी धरमेस गहि नामे नू पयसरी अरगआ गे नयग एड़पा अँड़सतअदस । इदि ख़ोंख़ा एड़पा ता छुतकन मेटाबआ गे अरा एड़पा नू पुना आल बरचका खतरी मून्द उल्ला नू डंड्डा कट्टतअनर। कुन्दरका गहि सोयता (छ:) उल्ला नू मलता नीकइय -नीकइम ओंद चन्दो मलता नीकइम गा इकला तमा दव बेड़ा ख़क्खरओ अउलम नामे पिंज्जना गहि उल्ला टिपनर। टिपिचका उल्ला गे तंगआ पाहियारिन नेवतअनर अरा ओना -मो-ख़ा गे समा नन्नर। 

          टिपिचका उल्ला पइरी नेम्हा बेड़ा नू नयगासिन म-ख़नर दरा एमआ -ख़जरअर नामे पिंज्जा गे चाली नू ओक्कनर। चाली नू पिटरी अट्टर ने-ग आलोन असन मड़ाबअनर। ने-ग आलो नू ओन्द सोड़ा ख़ेस्स,ओंटा पउती ख़े-ता नू ख़जरना ख़ज्ज,ओंटा पउती ख़े-ता नू बालका गुंड्डा,ओंटा ख़े-ता नू आबदा मे-र,एकात्ती नामे पिंजिरऊ ख़द्द/ख़द्दस गहि कुक्कन मुंड्डनर,ओंद लोटा ख़ेन्ना अम्म। इबड़ा हुरमी बिरहिन ओंटा डउड़ा नू सजअर अइट्टका पिटरी नू मड़ाबअनर। नामे पिंजिरऊ ख़द्द गहि कुक्कन ख़जरना ख़ज्ज ती ख़ज्जन अन्तले कुक्कता चुट्टिन एत्तअनर/मुंड्डनर। हुरमी चुट्टिन ओंटा ख़े-ता नू उइनर। नयगस मलता पंचर सोड़ा ता ख़ेस्सन तुड़ख़अर जोकक तीख़िल जमा नन्नर। अक्कु नयगस ओंटा चो-रो ख़े-ता नू ख़े-ना अम्म  निंदअर आ ख़ेस्स नींदका सोड़ा मंइय्या उइदस दरा बो-लो ख़द्दन तंग अज्जीबगर पाकर अरगनी (पुरेबे) छमहे ननर की ओक्कनर। नयगस मुन्ध नू ओंटा तीख़लन धरमेस गहि नामे ती,ओंटा तीखिल चाला पच्चो अरा धरमेस गहि नामे ती ओंटा तीख़लन पचवालर गहि नामे ती गोहररअर ख़े-ता ता अम्म नू टिड़दस। अबड़ा तीख़िल अम्म नू मुलखी काली।एन्ने मंज्जा ख़ोंख़ा नयगस मून्द (तीन) बेर ओंटा -ओंटा तीख़लन एका नामेन पिंज्जना र'ई आ नामे (अजा-अजी,नू नना -ननी मलता नेखअयदिम)धरअर ख़द्द गहि कुक्क नू ठेकाबअर आ अम्म खे़-ता नू जुदा -जुदा टिड़दस।अगर इबड़ा हुरमी तीख़िल अम्म नू ऊगनुम ओंद संग्गे जो-ड़रा केरा होले पंचर पइतअनर का ई नामेन ख़द्दस पइत्तारस दरा आ नामे दिम मनी काली। अगर तीख़िल मूलख़िया केरा मलता अकय गंहड़ी गूटी मल जो-ड़रा होले अदिन बड़ियअम मुलख़अर बुझुरनर का ई नामे मल्ला पसिंद दरा नन्ना नामे पिंज्जर पुना ती तीख़िल टिड़दस। 

          नामे होच्चका ख़ोख़ा ख़द्दन एमतअनर दरा इसुंग ख़सअर आबदा मे-र नू बालका रंगअर कड़मा नू करधानी अत्तअनर।एन्ने मंज्जका ख़ोखंम बुझुरनर का ई ख़द्दस अक्कु आलर गहि गन नू बरचा दरा असन धरमेस अरा पचवालर गे झरा चुरख़अनर अरा होरमर खरा रिज्जझ ती ओन्नर -मो-ख़र,पाड़नर -बे-चनर। इदि ख़ोंख़ा अउलम मलता नन्ना उल्ला मुंडुरका चुट्टिन ख़ाड़ नू बोहा बअनर चिइनर। आलर बुझुरनर का ख़ाड़ नू चुट्टिन बोहाबाचका ती आ ख़द्द गहि रोगे-पाप हुरमी परपन्द मनी काली आर गहि चुट्टि ख़ाड़ अम्म लेखआ हल-हलरआ परदो। ओंटा कत्था र'ई का ख़द्द कुन्दुरका ख़ोंख़ा अरगी नामे पिंज्जना गूटी कुन्दुरका उल्ला गहि नामे नुम पेसनर एकासे का:-सोमरा,मंगरा,बुधवा,बिरसी,एतवारी,सुकरो एन्नेम। अदहा -अदहा आलर गा ई कुन्दुरका नामेतिम पच्चा ख़च्चनर।एन्देर गे का आर गहि कुन्दुरका नामेनुम आलर पिंज्जनर।इदा तो पिंज्जका नामेन मोधोरनर कानर। ई भेसे मनी नामे पिंज्जना/पिंज्जका।