बिहउड़ी (अदला - बदला)

     कुँड़ुख़ ख़ोंड़हा नू पुरख़र हुरमी बेड़ा गे एन्ने दव-दव अइन कमअर तंगआ ख़ोंड़हन पोकता ती उइकर रअनर। एकअम लेखआ कचकच का झांझटन फरियआ गे ख़ोंड़हा नू नन्ना - नन्ना किसिम गहि अइन-कंदुन समजुगुत र'ई । इबड़ा अइननुम ओंटा बिहउड़ी अइन बनचकी र'ई। बेजेंरका ख़ों-ख़ा अम्बर नखरनर होले ई आइनतिम फरी - फटी मनी।

     ई ख़े-ख़ेल नू आलर दवलेकन जिनगिन खेपआ गे जवन -सेयान मंज्जा ख़ो-ख़ा कुक्को अरा कुकोय नू बेंज्जा मनर खेएना गूटि गे ओंद संग्गेम उज्जना गहि ओंटा मे-र नू हे-रनर कानर। बेंजरेका ख़ोंख़ा आलर तंगआ एड़पन स्वर्ग लेखआ कमआ बेद्दनर। पहें जोक्क - जोक्क आलर गहि बेंजेरका ख़ोंख़ा ओंद किसिम ही घोख मल जुमुरअर कत्था गड्डी-डिप्पा मनर आर गहि उज्जना खट-पट मना हिलिर'ई। एन्ने दसा नू बेंजेरका कुक्को-कुकोयर अम्बर नखरनर। एकसअनुम कुक्कोस दिम अम्बोस चिओस मलता एकसआनुम कुकोय दिम मल रआ बिल्ली। एन्ने मंज्जका ख़ों-ख़ा कुँड़ुख़ ख़ोंड़हा नू अड्डो खेदना गहि रीत बनचकी र'ई। अगर कुक्कोस कुकोयन मल उयदस होले कुकोय तरता पंचर कुक्कोस गहि एड़पा-पद्दा कालर अउर अगर कुकोय दिम मल र'ई होले कुक्कोस तरता पंचर कुकोय गहि एड़पा पइरिम कालर आर गहि ओंद हार अड्डो मलता मनख़ा एकदा रओ अदिन खेदअर ओन्दोरनर।

     एन्ने मंज्जका ख़ों-ख़ा नेख़य अड्डो मलता मनख़ा खेदअर होओनर आर तंगआ पद्दा ती पंच होअर की सइसरर पद्दा (एका पद्दा अड्डो मलता मनख़ा होअनर)कालर अख़ड़ा नू नेवइ नना गे पंचे ओक्कनर। पंच बरचकन ए-रर की आ पद्दा ता मुन्ध आल नेखय खतरी अड्डा मलता मनख़न ओन्दोरका र'ई आर तंगआ पद्दा ता आलारिन पंच ओक्का गे आननर। पंच नू एंड़ो पद्दा ता नयग, महतो,पुजार अरा कोटवारर मुध मन्नर। पहे़ पंच अड्डा नू सन्नी-कोहा होरमर गे कछनखरना गहि हक र'ई। पंच अड्डा नू मुन्द गा कत्थन ख़ोट्टनर अन्तले तरपांती ती कुक्को अरा कुकोय एंड़ो झनारिन फिचआ-फिचआ मेन्नर। एन्ने मंज्जका ती एका ओरतर ती गुनहा र'ई आद पता लग्गी काली। आ ख़ों-ख़ा एंड़ो तरता पंचर हुरमी कत्थन मेनर-ख़ोजर एंड़ो कुक्को - कुकोयन ओंद संग्गेम रआ गे सलहा चिइनर। एनने ती अगर बेंजेरका कुक्को-कुकोयर हुरमी कत्थन मोधोरर ओंद संग्गेम रअना गहि राय-रोजोट नन्नर होले आरिन संग्गेम रअना गहि सलहा चिअर कत्थन फरियअनर अरा पंच खर्चा भइर एंड़ो तरती होअर पंचर चोओनर कानर। पहें अगर संग्गे रअना गहि कत्था पोल्ला बनआ होले नेखय तरा दोस खतर'ई आर माइय्या जइरबना ओकतअनर। जइरबना ढिबा इवंदा मनी का आर गहि बेंज्जा खर्चा उरखी काली अरा एंडो तरता पंचर गे हूँ पंच खर्चा उरखी। जइरबना ढिबन चिच्चका ख़ोख़ा एंड़ो तरता पंचर रोजोट नन्नर का इन्ना ती ई पत्त नू एका तरती हूँ किरा-बिड़दा कचकच मल मन्ना चहि। ई कत्थन एड़ो तरतर इंजिरनर दरा पंचर चोओनर कानर। अन्तले होच्चका अड्डा - मलता मनख़न ओन्दोरनर की किरनर कानर‌ ।