भुइंहर अरा गंवरो

     कुँड़ुख़र हुल्लो परियातिम ई ख़े-ख़ेल नू रऊ आलर तलनर। ईर ओ-रे परियातिम ओंद अड्डानुम असथिर रआ पोलकर रअनर। कुँड़ुख़र गही उज्जना-बिज्जना खीरिन ईरका ती पता लग्गी का कुँड़ुख़र सिंधु घाटि नू इसवी चान मुन्ध 3000-2000 बछर गूटी अकय सुक्खे ती रहचर। सिंधु घाटि ती उरखर केरमे-केरमे कड़क,कर्नाटक पहटा नू केरर। असता बे-लस कुँड़ुख़ बे-लस दिम रहचस। आस ही नामे कनक पांय रहचा दरा असता "दोबारा"गढ़ आस गहि दिम रहचा। आ बे-लस गहि नामे ती आ पहटा ही नामे कनक राजी मंज्जा अरा आ पहटा ता भखा कुँड़ुख़ भखा दिम रहचा। अक्कुन गूट्टि हूँ 50% बराबरी कन्नड़ भखा सुपट कुँड़ुख़ बक दिम तली। कुँड़ुख़र कर्नाटक ती चोक्ख मनर मुम्बई बंबई अजगो मन्नुम नर्मदा ख़ाड़ कूटी-कूटी अमर कंटक ही परता पहटा किकट राजी अजम गढ़ बरचर। सिंधु घाटि ती इंवदा गेच्छा बरआ गे 500 बछर लग्गिया। ई कुँड़ुख़र दिम आनन्दगढ़ दरा पिपरागढ़ कमचर। ख़ो-ख़ा नू ईर सोन अरा करम नास ख़ाड़ ही मजही नू कएक बछर गूटी अकय सलसंत ती जिनगिन खेपचर। आ राजिन कुँड़ुख़ (खटवर करूष) राजी बआ लगियर। आ कुँड़ुख़ (करूष)राजी अक्कु ता सहाबाद जिला दिम तली। असन कुँड़ुख़र ई•सन ती 900-800 बछर मुन्ध गढ़ गुट्ठि कमचर अइय्यम रोहतास गढ़ हूँ बर'ई। इसन कुँड़ुख़र ई•सन ती मुन्ध 500-400 बछर गूटी अकय सुक्खे ती रहचर। ई अड्डा ती रसे-रसे झारखण्ड राजी (मुन्ध नू बिहार) तरा बरचर। इबड़ा कत्था "सय रामेश सी•दत्तस गही पुथि सिबिलाइजेसन आँफ इंडिया -1901,आनन्द कुमार दास गहि टूड़का पुथि दि उराँव आँफ सुन्दरवन-1969अरा ई•टी•डाल्टनस गहि टूड़का पुथि दि डिसक्रियटिभ एथ•आँफ बेंगाल पुथि नू ए-रा गे दहदर इथर'ई।

     तो एन्ने ओन्द अड्डा ती नन्ना अड्डा कालर हूँ कुँड़ुख़र तंगआ ख़ोडहा मजहिम उज्जनुम-ओक्कनुम बरआ लगनर। कुँड़ुख़र हुरमी नलख गे पोकता रअनर। अवंगेम एकअम अड्डा केरर असता अड्डा ईरयर का असता अड्डा आर गहि उज्जना-ओक्कना जो-गे र'ई का मल्ला। असन अम्म कंक सेब्बानुम ख़क्खेरओ का मला दरा खिती नना गे दवलेकन ख़ल्ल बनओ का मला। एन्ने ती एकसन दव लेक्खआ अड्डा बुझारा असानुम दोय मलता दोय सोय केम एड़पा कमचर अरा उज्जा-ओक्का गे चाड़ लेखआ टोड़ंगन खंड्डा-खंड्डा खल्ल कमचर। असन ओंद चोक्ख चाला कमचर दरा अरगनी (पूरबे) तरा देवी मड़ा कमचर। ओंन्द चोक्ख नू मसड़ा दरा कुंड्डी हूँ कमचर। इवंदा मंज्जका ती अदिन ओंटा पद्दा बाचर। पद्दा बसेचका ख़ों-ख़ा पद्दा सिंयानुम पहें खूरी ती गेच्छम एड़पा कमअर रआ हेलेरनर । एन्ने ती आद हूँ ओंटा पद्दा लेखअम इथर'ई मुदा अदिन पद्दा मल बअर टोला बअनर। चहे आद एकअम कोंहा रओ। बेगर चाला अरा देवी मड़ा गहि पद्दा मना पुल्ली। अइय्या ता रऊ आलर आ पद्दा ता भुंइहर मंज्जर दरा आर गहि कमचका ख़ल्ल आर गहि भुंइहरी ख़ल्ल मंज्जा। ई भुंइहरी ख़ल्ल ही मलगुजारी अक्कुन हूँ सरकार मल हु'ई अरा एन्ने ख़ल्लन ख़ें-दा का बीसा हूँ पोलनर।

     पहें नीकइम आ पद्दा नू ख़ों-ख़ा नन्ना अड्डा ती बरअर बसचर मलता ने-खअय दिम कुक्को ख़द्द मल मनर कुकोय ख़द्द भइर मंज्जर आर कुकोय ख़द्दन बिंज्जका ख़ों-ख़ा तम्हय सेवा सुसर खतरी तंगदन अरा तंग जवन ख़दीसिन उइय्यर। आर गहि जिनगी खूट-खूट आ पद्दा नुम बितई। एन्ने आलारिन गंवरो बअनर। पद्दा नू नयग, महतो, मुड़ा,पुजार नेम्हा ओहदा भुंइहर खोता ता आलर गे ख़क्खेर'ई , गंवरोर गे मला। इन्दरइम ने-ग मुन्ध भुंइहर खोता नू मनो अन्तले ख़ों-ख़ा नू गंवरो खोता नू मनी। इवंदा का गंवरोर ही मसड़ा हूँ जुदम र'ई।