चाला अरा झखरा (पूजा स्थल)

      इदि पत्त नू ओन्टे सन्नी कन खीरी एन्ने र'ई -दखिने राजि मद्रास नू एकदा कुँड़ुख बे-लस मदरस ही नामे ती मंज्जा। मंदर मलता मद्र अरा आस एंड़ बक ती ईद बनचा। आ मद्रास नुम मदरा बे-लस गहि पंचे भइय्योर राचर। पंचे भइय्योर नू ओंटस गहि सय (सात)ख़दद्दर मंज्जर। होरमर ती कोहस गहि नामे कइला राहचा ‌। ‌‌‌‌आर गे सतपुड़ा परता ही दखिने नू राजी ख़क्खरा । गोदा ख़ाड़ कूटि तंगआ राजधानी कमचर। बंकी बींड़ी संग्गे कइला बे-लस ही बेंज्जा मंज्जा । एकदा गहि राजि कलिंग राहचा।बंकी गहि नइहर कलिंग रहचा आद धरमेन सेवा पूजा उल्ला ना माख़ा ननु आली रहचा।हुरमी बेड़ा धरमेसिन गोहरारआ पूजा नना अरा अइय्यम मुलुख़की रआ लगिया। उल्ला ना माख़ा धर्मे डड्डिनुम पाडा लगिया।बअनर का आद एका बीरी धर्मे सेवा नू मुलुख़की रआ लगिया । आ बीरी अदि गहि कपड़े नू मूंद डींढ़ बन्ना भेसे एथेरआ लगिया अवंगेम कुँड़ुख़ पुरखर कुँड़ुख़ कुकोयर गहि कपड़े नू बन्ना चक्खतआ लगियर। पहें अक्कु बग्गे उल्ला मन्ना चड्डे अम्बरआ लगी।अदि गहि उल्ला -माख़ा धर्मे डन्ड्डी पाड़नन ए-रर तंग जादा बगर हिंसगारआ लगियर।कुँड़ुख रीत लेखआ कोहा भइस ही केच्चका ख़ो-ख़ा हूँ आर बे-ल मना पोल्लोर पहें।आर अख़आ लगियर का कइलस ही ओन्टा हूँ ख़द्दर मल रहचर। मइझलस ही ओन्टा कुक्कोस रहचस।रीत लेखआ कइलस ही ख़द्दर मल रअना होले मइझलस ही तंगदस बे-ल गद्दी नू ओक्कोस पहें। अक्कु ए-रनर का बंकी बींड़ी ओत्था ए-ख़ र'ई । ख़ने होरमा भइर अरा तंग जादा बगर जुमरअर अदिन बिसाही बआ हेल्लरर। आ घड़ि राजि नू ढेर आलर केच्चका रहचर ख़ने अदिनुम ओड़नर का ईदिम नस्सा।बे-लासिन रीत लेखआ डहरे ए-कना रहचा। उन्दुल बैइसकी मंज्जा बंकी बींड़ी आसन पंचर मझिम बाचा का "ए-न बिसाही मइलदन" पहें, भोट ख़त्ती  तरा मल ख़क्ख़रा अरा "बेचरंगा कइलस अरा बंकी बींड़ी ख़त्ती एन्देर ननोर।"  ओत्था ए-ख़ रहचा अवंगे गड्डी अरख़र अइय्या अदिन मल तुक्कियर।(आ बेडा़ नू मलदव नलख ननु आलारिन गड्डी अरख़र माड़ना अइन रहचा)अरा ओंटा बकसा नू सजअर ख़ाड़ नू बोहाबाचर चिच्चर।बोहारनुम -बोहारनुम ढेर गेच्छा नन्ना राजि चला केरा।नन्ना राजिन्ता महरर ओत्थरर।एकअम बेसे ढीरिम उल्ला नू तंगआ राजि फिन किरर बरचा।ख़नेगा अबरी कोंहा बइसकी (एमरजन्सी बेसे)एड्डर अरा बग्गे बिसाही बआ हेल्लरर।अबरी एन्ने नेवई नंज्जर का "सत्तपुड़ा परता ती आ पक्खे" बे-लस अम्म्बर बरदस नेकआ।ख़त्तस कइलस एन्देर ननोस,पंचर ही नेवईन मेन्नम रहचा,ओन्ना -मो-ख़ना जिनिस जोगाड़ ननर घोड़ो नू तंग्हय आलिन अरगअर काला हेल्लरस।ढेर गेच्छा अंजखंज टोडंग मझही अंड़सर बाचस-। "अक्कु नाम एंड़ो बिकइत इसानुम टोडंग नू रओत।" ए-रय इसन एवदा कोंहा बड़ा मन्न र'ई अरा अनआ - रितआ गहि ख़ंजपा-बड़ा ,पकरी डुम्बारी,ते-ला ,कीट्टी,दुड़ख़ो निंद्दकी र'ई। अरा अनआ रितआ ही ओ-ड़ा ख़ाख़ा हूँ निंद्दकी र'ई।नाम सेन्दरा बे-चोत दरा अहड़ा गुट्ठिन मो-ख़ोत-ओनोत अरा रओत। कइलस मझही टोड़ग नू ओंटा कुम्बा कमचस अन्तले एंडो बिकइत अइय्यम रआ लगियर।नितकी कइलस सेन्दरा बे-चा काला लगियस अत्तरा तिम तीनी रासि अरा ख़ंजपा गुट्ठि हूँ ओंदरअर बरआ लगियस।अबड़ानुम ओनर -मो-ख़र रआ लगियर। एन्नेम ननते ओन्द -एंड़ पे-ठ कट्टिया। अदि ख़ों-ख़ा कइलस तंग्हय आलिन ओतख़िम अम्मबर तंग्हय राजि किररयस केरस। लकड़ा -मेढ़हो राजि नू ओतख़िम चींख़नुम -ओलख़नुम रआ लगिया,धर्मे ही नामे ननर मे-ख़ा लगिया।ख़दमाख़रना उल्ला अंड़सकी बरआ लगिया।इकला उल्ला पूरचा कूल नुजना ती छटपटरआ हेल्लरा।आ बेड़ा नू आलर गहि सहड़ा लग्गी पहें ख़त्तिन सहड़ा चिआ गे अरा सेवा नना गे असन ने हूँ मल रहचर गोट्टा एड़पा (कुम्ब्बा) बिसर मंज्जा केरा। टोड़गं किन्को हेद्दे मना हेलरा। एन्ने बेड़ा नू खत्ती गे धरमेसिम सहाड़ा रहचस। ख़द्ददस कुन्ददरस एकअम बेसे ओग-लोटरनुम कुम्ब्बा ती बहरी पखना बेद्ददर। कुड्ड्न खन्डिया अन्तलेएकअम अन्ने टोडंगनुम गड्डी अरख़र पूँपन मंड्डिया। धरमेस गहि मया - टोड़ंग किकों लकड़ा मेढ़हो गुट्ठी टोड़ंग ख़ंजपा अरा तीनी छतना गुट्टिन ओंदरआ चिआ लगिया। अबड़ानुम ओनर-मो-ख़र उल्लन खेपआ लगिया।

       ख़द्दस गहि नामे दुक्खे नू अच्च ओंद्दरस खिलपइत नू अच्च ओंद्दरस बअर "हरे अच्च ओंद्दरस" पिंज्जयस। एकदासिन खट्टर हरिश्चन्द्र बअनर। बंकी बींड़ी गहि तंगदस परदा हेल्लरस। आद उल्ला -माख़ा धरमेस गहि सेवा नना लगिया। उन्दुल माख़ा बीरी कुम्म्बा गुसता बड़ा मन्न मंइय्या एंड़झनर गहि कच्छनखरना मेंज्जा।ओर्तस बअस :- चेरो नीन एकातरा केरका रहचखय।ख़ने उतारा नू:- बअस,अना धरमे !एकासे तेंग्गोन।कालर ईरकन कइला बे-लस ही राजि नू ख़ेबदा ख़ोरपना बेमारी मंज्जकी र'ई । ढेर बग्गे आलर बेजोड़ खेआ लगनर।धमेस बाचस:-एग्हय कत्थन मल मेनोर अरा एंग्हय ए-दका डहरे नू मल ए-कोर आर एन्नेम खेओर दरा मुंजरओर कालोर। ख़ने नन्नस बाचस:- अना बंगायो होर्मा कुँड़ुख़ारिन एन्ने मुंज्जोय चिओय होले बंगस बअर ने हर गोहरारओ धरमे। धमेस बाअचस:-हाँ बछरना गहि ओंटे उपाइ र'ई :- ई बड़ा मन्न किय्याता एकअम आलोन आर ही ख़ेबदा नू सओर होले कोड़े मनो कालो। बंकी बींड़ी चो-चा बड़ा मन्न हेद्दे केरा दरा चींख़ा हेल्लरा अरा बाचा:- ए बंग्गायो ए-न कालोन एंग्गन तइय्या। मंइय्या ती चाल मेंद्दरा कलय। ई धरमेस गहि चाल चिच्चाका करनेम कुँड़ुख़ नू ख़द्दी पूजा अड्डा गहि नामे चाला मंज्जा। ई धरमेस गहि चालतिम,एन्देर न का धरमेस बंकी गने कच्छनखरना अरा बंकी हूँ आस गहि कत्थन मेंज्जा,बुज्झरा एन्देर गे का धरमेस कुँड़ुख़ति कच्छनखरस।आस गहि तिंग्गका लेखअम बड़ा मन्न किय्याता ओ-ड़ा गुहारिन आर गहि खे़बदा नू सओर होले कोड़े मनो कालो। 

         कइलस गहि राजिन्ता आलर अरा एड़पन्ता होरमा आलर अदिन बिसाही बाचर दरा एड़पन्ति ओत्थरका रहचर। ईद जोक्क उल्ला ता दिंम कत्था रहचा। हरे अच्च ओंद्दरस कुंदुरकस रहचर।आर गहि डाहचकन मल मोधरकी रहचा अन्नु हूँ बंकी बींड़ी धरमेस गहि चाल मेनर तंगआ आलारिन बच्छाबआगे ओ-ड़ा गुहारिन होअर तंगदस गने काला हेल्लरा। ईदिम कुँड़ुख़ जिया तली। ने धरमे ए-ख़ नू रओर आर इन्ना हूंँ धरमेस गहि चालन मेनोर। आस आस कुँड़ुख़र गही दुक्खे - सुक्खे नू सहड़ा चिओस।तंगआ आलर तंगआ ख़ोड़हन (जितना)मल अम्मबोर आरगे एवंदा दुक्खे ख़क्खरओ अन्नु हूँ आर मल खिंसारओर।नेखय मंइय्या खींस अरगी आर मंइय्या ख़प्पा र'ई एकासे का :- ककड़ो गहि खपराही नू धरमेस ख़प्पा कमचस।बंकी तंगआ राजि केरा।एवंदा -एवंदा आलर केच्चर अरा एवंदा आलर बेमार ती बिडिरका रहचर।ख़ेबदन सफा ननर मंदर नंज्जा।लाखो आलर रहचर टोला-पड़ा ,पद्दा कालर होरमारिन मंदर नंज्जा। बे-लस अदि गहि नलख ए- रर मेनर आदिन गढ़े मे-ख़ताचस । चिच्चस होरमर गहि ख़न्नन तेभचस चिच्चस। मने पपहा आलर धरमे आल मंज्जर केरर।गोट्टे राजि ता आलर अदिन धर्मी अयंग बआ हेल्लरर।

        नन्ना बछर एका बेड़ा नू धरमे बंगस चाल चिच्चका रहचस।बे-लासिन बाचा फलना उल्ला नू गोट्टे परजारिन गढ़े मे-ख़ना मनो।डहुड़ा कुद्दिया गोट्टे राजि ता आलर गोहगोहरअन बरआ हेल्लरर।बे-लस गहि तंग भइय्यो बगर हूँ बरचर।गोट्टे गढ़े परजाति निंद्दया केरा।  धर्मी अयंग गहि ओहमा पाड़ा हेल्लरर,गढ़े नू गुंगवारआ हेल्लरा।  बंकी बींड़ी होरमारिन चिन्हआ लगिया।तंग एरख़ो बगर अरा तंग जादा बगर होरमर अदि गहि गुड़ख़िन एंवसरअर मोंजरा मना लगियर।बंकी बींड़ी चींख़ा हेल्लरा।  चींख़ा - चींख़ा लाखों आलर मझही बआ हेल्लरा,ईनिम बंकी बींड़ी तलदन!निम्हय बींड़ी। ईसिम आ ख़द्दस एकदस कूल नू रहचस आबीरीम नीम एंग्गन एड़पा ती ओथरकर चिच्चकर।होरमर कत्थन मेनर उमतारर - बउड़ारर (पागल) केरर।धरमे चाल चिच्चकन अरा कच्छनखरकन केरमे -केरमे(धीरे धीरे) तिंग्गया,अरा बाचा -ने-ला नाम भइर उल्ला उबसोत ख़े-ख़लन ने हूँ अम्मबोर अरख़ा।इन्नातिम आ अइनन एसआ लगदन का नम्हय आलर मलदव नलख ननु आलारिन गड्डी अरख़र उज्जनुम माड़ा लगियर। आ अइन ने- ला ती मुंजरओ कालो।इवंदा उल्ला नाम गुनहा नंज्जकत अरा नम्हय पुरखर ती मंज्जा अदिगे नमा छमा नेअना मनो अरा ए-दना मनो का इन्नतिम गड्डी अरख़र माड़ना अइन मुंज्जरा केरा।गढ़े ती आ पक्खे अमरय (बगीचा)रहचा।असन बड़ा मन्न अरा नवोर मन्न हूँ रहचा ‌। उन्दुल मुन्ध घांसी छोलअर सफा ननतआ आनिया।  नन्ना उल्ला पइरिम ढोल डमुवा,ताल -करतल संग्गे गोट्टे परजा आ अड्डा अंड़सिया। होरमा परजारिन तंग्हय बितचका खीरिन अरा धरमे गने कच्छनखरकन केरमे -केरमे तिंग्गिया ख़ने होरमा आलर ख़ेक्खा जोड़अर धरमे ती छमा नेआ हेल्लरर ए उज्जनुम रऊ धरमे नीन एमन मल अम्मबदय निंग्हय दया धरमे एम्हय संग्गे र'ई ।  होरमर नवोर पूँपन मे-झरर बड़ा ख़ंजपन मोक्खर।आ परियातिम इन्ना गूटी कुँड़ुख़र ख़द्दी मन्नर। धरमेस चाल चिच्चस अन्नेम इन्ना गूटि हूँ धरमेस चाला टोंका नू चाल चिअदस।आ ख़नेतिम कुँड़ख़र ख़द्दी नू चाला पच्चो इदातो बंकी बींड़ी तुले तिंका धरमेन मननर।एकदन खटवर आल जे आर सरना बअनर आ परिया तिम इन्ना गूटि चइत चन्दो इदातो पुना बछर नू चाला अयंग गहि पूजा नंतारई। पुना अइन बंचका करनेम कुँड़ख़र चइत चन्दोन पुना बछर गहि पुना चन्दो बअनर इवंदा गूटि का पुना बिहनी हूँ अउलम ओथरनर।