कुंँड़ुख़र गहि सिरजन-खीरी

ओ- रे नू मेरखा़ ख़े-ख़ेल अरा ख़े-ख़ेल ता हुरमी आलो गहि सिरजन एका से मंज्जा हंअन?इबडा कत्था हुरमी जइत ख़ोडहा का धरम ख़ोड़हा ता पुरखा खीरी नू तंग-आ-तंग-आ किसिम नन्ना-नन्ना र`ई।अन्नेम कुंडुख ख़ोड़हा नू हूं तंग-आ लेख-आ पुरखा खीरी उज्जनुम र`ई।‌‌

         बअनर मुन्ध नू हुरमी तरा अम्म दिम अम्म नींदकी रहचा।एकसन हूं ख़ज्ज का ख़े-ख़ेल मल एथेरआ लगिया।ख़ने धरमेस ख़े-ख़ेल कमना गहि तिहा नू घोखआ हेलरस का एका भेसे अम्म कीते ख़ज्ज ओन्दरअर ख़े-ख़ेल कमना मनो?आबीरिम ककडो़ धरमेस हेद्दे बरचा दरा बाचा -`ए-न कादन धरमे,ख़ज्ज ओन्दरआ ।'दरा ककड़ो अम्म किय्या कालर तंग्हय बक्का ती ख़ज्जन ख़ेवचर बरआ हेलरा।बरनुम -बरनुम अदि गहि बक्का ता हुरमी ख़ज्ज गा नो-ड़रा केरा।''धरमेस बाचस ए-रा गे अकय उजगो इथरदी पहे नीन गा खरा टेड़हो रअदी।कलय एका से निंगहय बिहइत इन्नाती अन्नेम ए-कोय।"अउलाति ककड़ो टेड़हो ईकी अरा अड्डे ईरी।

            अक्कु धरमेस अकय घोख नू पडा़रस केरा।धरमेस गहि दुक्खेन ए-रर "एक्का तंग्हय छतिन डिप्पा नन्नुम बरचा दरा बाचा -ए-न कालोन धरमे एंग्गन तइय्या।ख़ने धरमेस-"कलय"।एक्का अम्म किय्या केरा दरा ख़ज्जन तंग्हय मे-द नू भइर मे-द लद्दरा दरा बरआ हेलरा।बरनुम -बरनुम अदि गहि मे-द ती हूं हुरमी ख़ज्ज अम्म नू नो-डरा केरा अरा आद हूं धरमेस गुसन नीदिम अंड़सिया। ख़ने धरमेस आनियस - आबिरी गा छतिन डिप्पा ननर बाचकी का ए-न ओन्दरोओन धरमे,एंग्गन तइय्या।"ख़त्ती एक्का लज्जरा दरा कुक्कन नुड्डा चिच्चा।अक्कुन हूं आलारिन ईरी दरा कुक्कन नुड़ई चि'ई।

              अक्कु गा धरमेस अउर अकय घोख नू पडा़रदस  कादस आस घोखदस का ने दुरा ई नलखन नना ओंग्गो?आबीरिम लेन्डा बरचा बाचा -ई नलखन ए-ननोन।"लेन्डा गहि कत्थन मेनर धरमेस बाचस-"ककडो़ गहि बक्का रहचा अरा एक्का गहि मे-द अकय चकड़ रहता, कन्नु हूं अबड़ा ख़ज्ज पोल्ला ओन्दोरआ।नीन एकासे ओन्दोरओय?"ख़ने लेन्डा बाचा-चिहुंट नन्दन धरमे,पोल्लोन होले क्षमा ननके।"अक्कु लेन्डा अम्म किय्या केरा दरा ढेर ख़ज्जन मोक्खा अन्तले अम्म ती बहरी उरखर एक्का गहि मे-द नू तुरिया।आ ख़ज्ज दिम एक्का मे-द नू ख़े-ख़ेल बनचा केरा।अवंगेम आलर बअनर का एक्का दिम ख़े-ख़ेलन चिड्डकी र'ई अरा एका बीरी ख़ेसेर बदलि'ई आबीरि ख़े-ख़ेल नुकु'ई(भूकम्प होना)अक्कु धरमेस अकय खुसमारस दरा आ ख़ज्ज ती एंड मुरुत (दो मूर्तियां)कमअर ख़ाया गे उइय्यस।ख़ने गा धरमेस गहि अंखराज-पंखराज घोड़ो उडियरनुम बरचा दरा लथचा चिच्चा।धरमेस अउर मुरूत कमचस दरा खा़या गे उइय्यस।ख़ने आ घोडो़ अउरहेम बरचा दरा लथचा चिच्चा।अक्कु धरमेस अकय खिसारस दरा घोड़ो गहि डेनन खंडि्डयस चिच्चस। अक्कु मून्द खेवां मुरुत कमअर अल्लन खा़पा गे उइय्यस।अवंगेम इन्ना हूं कुंड़ुख़र एड़पा-बटगी खा़पा गे अल्ला पोसनर।अबरी अल्ला घोड़ोन भुकनुम ख़ेदआ हेलरा ख़ने पोल्ला लथआ।पहें धरमेस अउर लथआ टकना गहि इलचका ती बेगर खा़या चिअम अबडा़ मुरुत नू जिया सज्जस चिच्चस।अवंगेम आलर खेएनर।जिया सज्जस ख़ने ओरोत मुक्का अरा ओरोत मे-त आल बनचर केरर दरा ईर तिम आलर बढ़रआ हेलरर।ख़ोखा़ नू धरमेस उल्ला ना माखा़ बीड़ी,चन्दो,बीनको अरा खे़-ख़ेल ता हुरमी आलोन कमचस।केरमे-केरमे आलर गोट्टे खे़-खे़ल नू नींदयर केरर।खरा सुक्खे ती उज्जा बिज्जा हेलरर दरा आलर तंगआ-तंगआ जिया गे उज्जा हेलरर,धरमेसिन हू मोधरर केरर।ख़े-खे़ल नू पाप नलख मना हेलरा।एन्ने ती उन्दुंल धरमेस गे चिच्च -चें-प तइना गहि चाड़ मनी काली।